కోహ్లీ.. అనుష్కలు ఉండే ఇల్లు ఇదేనా?

నిజమే.. కాస్త అడ్వాన్స్ గా ఆలోచించినట్లే.  చూడముచ్చటైన ప్రేమ జంట స్టార్ క్రికెటర్ విరాట్ కోహ్లీ.. బాలీవుడ్ బ్యూటీ అనుష్క శర్మల భవిష్యత్ నివాసం ఇదేనా అన్న భావన కలిగేలా పరిణామం ఒకటి చోటు చేసుకుంది మరి. పీకల్లోతు ప్రేమలో మునిగిపోయిన ఈ జంట తర్వాత రోజుల్లో బ్రేకప్ కావటం.. ఈ మధ్యనే మళ్లీ ప్యాచప్ అయిన సంగతి తెలిసిందే. మరి.. వీరి మధ్య కథ పెళ్లి వరకూ వెళుతుందో లేదా అన్నది ఒక సందేహమైతే.. తాజాగా మాత్రం కోహ్లీ ఒక ‘‘ఇంటివాడు’’ అయ్యాడు.

దేశ వాణిజ్య రాజధాని ముంబయి మహానగరంలోని వర్లీ ప్రాంతంలో ఓంకార్ 1973 ప్రాజెక్ట్ లో ఒక ప్లాట్ ను కొనుగోలు చేశాడు. ఏడు వేల చదరపు అడుగులు ఉన్న ఈ ఫ్లాట్ కు ప్రస్తుతం నాలుగు గోడలు మాత్రమే కట్టినప్పటికీ.. ఈ ఫ్లాట్ మొత్తాన్ని కోహ్లీ అండ్ కో (అనుష్క శర్మ అనుకోవచ్చేమో?) అభిరుచికి తగ్గట్లుగా కట్టించి ఇస్తారు. ఇంతకీ కోహ్లీ కొన్న ఈ ఫ్లాట్ ఖరీదు ఎంతంటారా? జస్ట్ రూ.34 కోట్లు మాత్రమే. కోట్లాది రూపాయిలు సంపాదించే కోహ్లీ.. అనుష్కలకు ఇది పెద్ద మొత్తం కాదేమో?

ఆసక్తికరమైన విషయం ఏమిటంటే.. తాజాగా కోహ్లీ కొన్ని ఇదే ప్రాజెక్ట్ లోని 29వ అంతస్థులో క్రికెటర్ యువరాజ్ సింగ్ సైతం ఒక ఫ్లాట్ కొనుగోలు చేశాడు. ఈ మధ్య కాలంలో ప్రేయసి అనుష్కశర్మతో కలిసి తమకు సూట్ అయ్యే ఫ్లాట్ కోసం తిరిగిన వారు.. ఈ ఫ్లాట్ తో ప్లాట్ అయిపోయారని చెబుతున్నారు. బీచ్ వ్యూతో ఉన్న ఈ ఫ్లాట్ అదరగొట్టేలా ఉంది. ఈ ప్లాట్ నిర్మాణాన్ని 2018లో పూర్తి చేసి కోహ్లీ చేతికి తాళాలు ఇచ్చేస్తారని చెబుతున్నారు.