క్రికెట్ గ్రేటెస్ట్ ‘రైవల్రీ’ డాక్యుమెంటరీ ట్రైలర్..అభిమానుల పండుగే

ఫుట్ బాల్ లో అర్జెంటీనా-బ్రెజిల్ ఎలాగో క్రికెట్ లో భారత్-పాకిస్థాన్ మధ్య మ్యాచ్ లు అలాగా..? వన్డే, టి20ల్లో ఎక్కడైనా కానీ.. ఈ రెండు జట్లు ఎదురుపడితే వారాల ముందుగానే టికెట్లు తెగుతాయి. ఇక టెస్టుల్లో ఎలాగూ ప్రపంచ టెస్టు చాంపియన్ షిప్ లో తప్ప ఈ రెండు జట్లు తలపడే చాన్స్ లేదు. ఇటీవలే టి20, అంతకుముందు వన్డే ప్రపంచ కప్ లు జరిగాయి. భారత్-పాక్ ముఖాముఖి సిరీస్ లు లేవు. మరి ఈ రెండు జట్ల మధ్య మ్యాచ్ మజాను ఆస్వాదించేది ఎలా..? ఆ లోటు తీర్చేందుకే వచ్చేసింది చాంపియన్స్ ట్రోఫీ.

ఫిబ్రవరి 19నుంచి పాకిస్థాన్ వేదికగా చాంపియన్స్ ట్రోఫీ జరగనున్న సంగతి తెలిసిందే. ఈ టోర్నీలో భారత్ ఆడే మ్యాచ్ లు మాత్రం దుబాయ్ లో జరుగుతాయి. భద్రతా కారణాల రీత్యా పాకిస్థాన్ లో పర్యటించేందుకు భారత్ అంగీకరించలేదు. దీంతో టీమ్ ఇండియా మ్యాచ్ లను దుబాయ్ లో నిర్వహిస్తున్నారు.

భారత్-పాక్ మధ్య క్రికెట్ మ్యాచ్ అంటే మామూలు మాటలు కాదు కదా..? అయితే, కొన్నేళ్లుగా ఒక ట్రెండ్ నడుస్తోంది. ఈ రెండు జట్ల మ్యాచ్ సందర్భంగా ‘ఓ సెటైరికల్ వీడియో’ను రూపొందించి ప్రేక్షకులను ఆకట్టుకుంటున్నారు. అలా మ్యాచ్ కు ముందే భావోద్వేగాన్ని రగిలిగిస్తున్నారు.

ఇప్పుడు చాంపియన్స్ ట్రోఫీ సందర్భంగా భారత్-పాక్ మధ్య చరిత్రను వివరిస్తూ ఓటీటీ ఫ్లాట్ ఫామ్ నెట్‌ ఫ్లిక్స్ తన కొత్త డాక్యుమెంటరీ, "ది గ్రేటెస్ట్ రివాల్రీ: ఇండియా వర్సెస్ పాకిస్థాన్" పేరిట తీసుకొచ్చింది. దీని ట్రైలర్ బుధవారం విడుదలైంది.

ఇటు గంగూలీ.. అటు...?

ఈ వీడియోలో భారత దిగ్గజాలు వీరేంద్ర సెహ్వాగ్, సౌరవ్ గంగూలీ, సునీల్ గవాస్కర్, మేటి బ్యాటర్ శిఖర్ ధావన్, పాకిస్థాన్ దిగ్గజాలు షోయబ్ అక్తర్, ఇంజమామ్-ఉల్-హక్ లు క్రికెట్‌ లో రెండు దేశాల మధ్య పోటీ గురించి మాట్లాడడం కనిపించింది.

‘‘ఇది లెజెండ్స్ చెప్పిన అతిపెద్ద పోటీ. ది గ్రేటెస్ట్ రివాల్రీ. ఇండియా వర్సెస్ పాకిస్థాన్, ఫిబ్రవరి 7 నుంచి కేవలం నెట్‌ ఫ్లిక్స్‌ లో.. అభిరుచి, కీర్తి.. క్రికెట్ తీవ్రమైన పోటీ కథలోకి ప్రవేశించండి’’ అని నెట్ ఫ్లిక్స్ రాసుకొచ్చింది.

కాగా.. నెట్ ఫ్లిక్స్ ట్రైలర్ చూశాక అభిమానులు భారత్-పాక్ క్రికెట్ పోటీ చరిత్రను చూసేందుకు అవకాశం దక్కింది. రెండు దేశాల మధ్య క్రికెట్ కు సంబంధించి కొన్ని అద్భుత క్షణాలను తిరిగి పొందాలనే ఆసక్తి రేకెత్తేలా ట్రైలర్ ఉంది. కాగా, ది గ్రేటెస్ట్ రివాల్రీ: ఇండియా వర్సెస్ పాకిస్థాన్ ఫిబ్రవరి 7న నెట్‌ ఫ్లిక్స్‌ లో ప్రసారం కానుంది.