షారూక్ కి అలియాభట్ కావాలట.. జవాన్ ట్రైలర్..!

బాలీవుడ్ బాద్ షారూక్ చివరగా పఠాన్ మూవీతో ప్రేక్షకుల ముందుకు వచ్చాడు. చాలా కాలం తర్వాత ఆయనకు వచ్చిన హిట్ ఇది. ఈ సినిమా బాక్సాఫీసు వద్ద కాసుల వర్షం కురిపించింది. ఆయన స్టార్ డమ్ ని మరోసారి బాక్సాఫీసుకు రుచి చూపించిన సినిమా అది. అయితే, మరోసారి ఆయన బాక్సాఫీసుకును షేక్ చేయడానికి రెడీ అయ్యారు. షారూక్ హీరోగా నటిస్తున్న తాజా చిత్రం జవాన్. ఈ సినిమా వచ్చే నెల ప్రేక్షకుల ముందుకకు రావడానికి రెడీ అయ్యింది.

ఈ క్రమంలో తాజాగా మూవీ టీమ్ ట్రైలర్ విడుదల చేశారు. నిజానికి మూవీ పేరు విని ఆయన ఒక జవాన్. దేశ భక్తి నేపథ్యంలో సాగుతుంది అని అనుకున్నారు. అదే విషయం ట్రైలర్ చూస్తే అర్థమయ్యింది కానీ, దానిలో ట్విస్ట్ ఉంది. ట్రైలర్ లో మొదటి సీనే ఆయన ఓ మెట్రో రైలును హైజాక్ చేయడంతో మొదలైంది. గతంలో జవాన్ గా సేవలు అందించిన ఆయన దేశ ద్రోహం కిందకు వచ్చే హైజాక్ ఎందుకు చేశాడు అనేది తెలియాలంటే, సినిమా చూడాల్సిందే. ట్రైలర్ మధ్యలో మీకు ఏం కావాలి అంటే, అలియా భట్ కావాలి అంటూ ఆయన చెప్పిన డైలాగ్ హైలెట్ గా నిలిచింది.

ఇక, ఈ సినిమాలో లేడీ సూపర్ స్టార్ నయనతార హీరోయిన్ గా నటిస్తోంది. ఆమె ఓ పోలీసు అధికారిగా ఇందులో కనిపిస్తుండటం విశేషం. ఈ సినిమాకి తమిళ డైరెక్టర్ అట్లీ దర్శకత్వం వహిస్తున్నారు. అయితే, జవాన్ ట్రైలర్ చూస్తుంటే అట్లీ గత సినిమాల ప్రభావం ఎక్కువగా కనపడుతుంది. ముఖ్యంగా విజయ్ కత్తి మూవీలో రైతులకు న్యాయం చేయడం కోసం నగరంలోని ప్రజలకు నీరు రాకుండా ఆపేస్తాడు. తర్వాత రైతులకు న్యాయం చేస్తాడు.

ఇప్పుడు, ఈ సినిమాలోనూ అలాంటి సీన్లే కనిపిస్తున్నాయి. ఎవరో జరిగిన అన్యాయానికి రివేంజ్ తీర్చుకోవడానికే ఆయన మెట్రో హైజాక్ డ్రామా ఆడుతున్నాడని తెలుస్తోంది. కథ ఎలా ఉన్నా , సినిమాలో యాక్షన్ సీన్స్ ఎక్కువగా ఉన్నాయని తెలుస్తోంది. ఇక, ట్రైలర్ లో వెనక బ్యాగ్రౌండ్ వాయిస్ లోనూ తాను ఓ అడవికి రాజునంటూ ఆయన పరిచయం చేసుకునే విధానం బాగుంది.

ఈ జవాన్ మూవీలో విజయ్ సేతుపతి విలన్ గా నటిస్తున్నారు. ఆయన లుక్ కూడా చాలా డిఫరెంట్ గా ఉంది. ఈ సినిమాని రెడ్ చిల్లీస్ ఎంటర్ ట్రైన్మెంట్ బ్యానర్ పై షారూక్ భార్య గౌరీ ఖాన్ నిర్మిస్తుండటం విశేషం. సెప్టెంబర్ 7 వ తేదీన అన్ని భాషల్లోనూ ఈ సినిమా థియేటర్లలోకి అడుగుపెట్టనుంది.