ట్రైల‌ర్‌: అమ్మాయి కోసం దాయాదుల‌ గలాటా

ప్రేమ‌- స్నేహం నేప‌థ్యంలో ఇప్ప‌టికే ఎన్నో సినిమాలు విడుద‌లై ఘ‌న‌విజ‌యం సాధించాయి. స్టార్లు మార‌తారు .. కానీ థీమ్ అదే.. అవే సెన్సిబిలిటీస్.. నిజ‌జీవితంలో ఎన్నో సంఘ‌ట‌న‌ల ఆధారంగా ద‌ర్శ‌క‌ర‌చ‌యిత‌లు ఇలాంటి సినిమాల‌కు స‌న్నివేశాల‌ను స‌మ‌కూర్చుకోవ‌డం ప్ర‌తిసారీ కొత్త‌దనాన్ని ఆవిష్క‌రిస్తుంది. ప్రేమ‌- స్నేహం-విరోధం నేప‌థ్యంలోనే వ‌చ్చిన ప్రేమ‌దేశం- చెలి లాంటి చిత్రాలు యూత్ ఆద‌ర‌ణ‌తో బ్లాక్ బ‌స్ట‌ర్లుగా నిలిచాయి.

తాజాగా ఇదే బాట‌లో విడుద‌ల‌వుతున్న మ‌రో సినిమా-యారియన్ 2. దివ్య ఖోస్లా కుమార్, యష్ దాస్‌గుప్తా, అనశ్వర రాజన్, మీజాన్ జాఫ్రీ, వరినా హుస్సేన్, ప్రియా వారియర్, పెరల్ వి పూరి నటించారు. రాధికా రావు-వినయ్ సప్రూ సంయుక్తంగా దర్శకత్వం వహించారు. ఈ చిత్రంలో దాయాదులైన ఇద్ద‌రు స్నేహితుల‌ కలయిక క్రేజీ రిలేషన్‌షిప్ నేప‌థ్యంలో భావోద్వేగాల సెల‌బ్రేష‌న్ ని తెర‌పై ఆవిష్క‌రిస్తున్నారు.

`యారియాన్ 2` టీజర్ తాజాగా విడుద‌లైంది. ఇరువురు దాయాదుల మధ్య ఉన్న సాన్నిహిత్యం.. నిజాయితీతో కూడుకున్న‌ స్నేహానికి సంబంధించిన క‌థాంశ‌మిది. కజిన్స్ అయినప్పటికీ, వారి సంబంధం నిజమైన స్నేహంతో ముడిపడి ఆక‌ట్టుకుంటోంది. టీజర్ హిట్ ట్రాక్ `సన్నీ సన్నీ` ఉత్కంఠ‌ను క‌లిగిస్తుంది. ముఖ్యంగా టీజ‌ర్ ఆద్యంతం దివ్యా ఖోస్లా అద్భుత న‌ట‌న క‌ట్టి ప‌డేస్తుంది. తాజాగా టీజ‌ర్ ని విడుద‌ల చేసిన మేక‌ర్స్ అక్టోబర్ 20న యారియాన్ 2 థియేట‌ర్ల‌లోకి విడుద‌ల‌వుతుంద‌ని ప్ర‌క‌టించారు.

యారియన్ 2 ప్రేమ, స్నేహం, భావోద్వేగాలతో పాటు ఫ్యామిలీ ఆడియెన్ మెచ్చే అన్ని విషయాలతో ఆరోగ్యకరమైన కథను తీసుకు వ‌స్తున్నామ‌ని టీమ్ ప్ర‌క‌టించింది. గుల్షన్ కుమార్ T-సిరీస్ సినిమాలు మరియు రావ్ & సప్రు ఫిల్మ్స్ ప్రొడక్షన్ స‌మ‌ర్ప‌ణ‌లో ఈ చిత్రం తెర‌కెక్కింది. అక్టోబర్ 20న థియేటర్లలోకి రానున్న ఈ చిత్రాన్ని భూషణ్ కుమార్, క్రిషన్ కుమార్, దివ్య ఖోస్లా కుమార్, ఆయుష్ మహేశ్వరి నిర్మించారు. రాధికా రావు-వినయ్ సప్రు దర్శకత్వం వహించారు.