ఏపీలో 108తో 'పుష్ప'కి భారీ రికార్డ్‌
ఇప్పటి వరకు ఏపీలో ఏ హీరోకు దక్కని అరుదైనా, అతి పెద్ద కటౌట్‌ గౌరవం అల్లు అర్జున్‌కి దక్కబోతుంది.
తెలుగు ప్రేక్షకులతో పాటు పాన్‌ ఇండియా స్థాయి ప్రేక్షకులు ఎంతో ఆసక్తిగా ఎదురు చూస్తున్న పుష్ప 2 సినిమా డిసెంబర్‌ 5న రాబోతుంది అంటూ మేకర్స్ మరోసారి అధికారికంగా ప్రకటించారు. విడుదల వారం వాయిదా అంటూ వచ్చిన వార్తలను ఖండిస్తూ మేకర్స్ అస్సలు తగ్గేది లేదు అంటూ అల్లు అర్జున్‌ పోస్టర్‌ను షేర్‌ చేయడంతో ఇక ఎవ్వడు ఆపలేరు అంటూ బన్నీ ఫ్యాన్స్ ఫుల్‌ జోష్‌తో ఉన్నారు. అల్లు అర్జున్‌ ప్రస్తుతం పాట చిత్రీకరణలో పాల్గొంటున్నారు. రేపటితో సినిమా షూటింగ్‌ మొత్తం పూర్తి కానుంది. ఇక వారం రోజుల్లోనే పోస్ట్ ప్రొడక్షన్ వర్క్‌ని ముగించే అవకాశాలు ఉన్నాయని తెలుస్తోంది.
అల్లు అర్జున్‌కి దేశ వ్యాప్తంగా ఉన్న ఫ్యాన్ ఫాలోయింగ్‌కి మతి పోతుంది. ఇటీవల బీహార్‌లో పుష్ప 2 సినిమా ట్రైలర్‌ లాంచ్ ఈవెంట్‌ జరిగింది. రెండున్నర లక్షల మంది ఆ ఈవెంట్‌లో పాల్గొన్నారు అంటూ వార్తలు వస్తున్నాయి. ఒక జాతీయ పార్టీ మీటింగ్‌కు సైతం హాజరు కాని స్థాయిలో బన్నీ సినిమా ఈవెంట్‌కు హాజరు కావడంతో మొత్తం నార్త్‌ ఇండియాలో పుష్ప 2 గురించి చర్చ జరుగుతోంది. మరీ ఇంత రచ్చ రంబోలా ఏంట్రా బాబు అంటూ ప్రతి ఒక్కరు ముక్కున వేలేసుకుంటున్నారు. ఇప్పుడే ఏపీలో సరికొత్త రికార్డ్‌ను పుష్ప ఫ్యాన్స్ నెలకొల్పబోతున్నారు.
ఇప్పటి వరకు ఏపీలో ఏ హీరోకు దక్కని అరుదైనా, అతి పెద్ద కటౌట్‌ గౌరవం అల్లు అర్జున్‌కి దక్కబోతుంది. ఏకంగా 108 అడుగుల ఎత్తు ఉండే పుష్ప కటౌట్‌ను వైజాగ్‌లోని సంగం శరత్‌ థియేటర్‌ వద్ద అభిమానులు ఏర్పాటు చేస్తున్నారు. ఇప్పటి వరకు ఏపీలో ఈ స్థాయి కటౌట్‌ ను ఏ ఒక్కరు ఏర్పాటు చేయలేదు అనేది టాక్‌. 108 అడుగుల ఎత్తు ఉండే ఈ కటౌట్‌ ఏకంగా 16 అడుగుల వెడల్పు ఉంటుందని ఫ్యాన్స్ చెబుతున్నారు. సినిమా విడుదలకు పది రోజుల ముందు నుంచే సంగం థియేటర్‌ వద్ద ఈ కటౌట్‌ ప్రత్యేక ఆకర్షణగా నిలుస్తుంది.
నవంబర్‌ 24న సాయంత్రం సమయంలో అల్లు అర్జున్‌ అభిమానులు భారీ ఎత్తున హాజరు కాబోతున్న వేడుకలో ఈ కటౌట్‌ను ఆవిష్కరిస్తామని అభిమాన సంఘం నాయకులు ప్రకటించారు. అల్లు అర్జున్‌కి వైజాగ్‌లో ఇప్పటి వరకు ఏ సినిమాకు సాధ్యం కాని, ఇప్పటివరకు ఏ సినిమా సాధించలేని వసూళ్లను ఇవ్వబోతున్నాం అంటూ ఫ్యాన్స్ చెబుతున్నారు. రేపు చెన్నైలో భారీ ఎత్తున ఈవెంట్‌ నిర్వహించబోతున్నారు. ఆ ఈవెంట్‌ లో పాటను విడుదల చేసే అవకాశాలు ఉన్నాయి. మొత్తానికి పుష్ప 2 సినిమా స్థాయి రోజు రోజుకు పెరుగుతూనే ఉంది. రెండు వేల కోట్ల టార్గెట్‌తో రాబోతున్న ఈ సినిమా ఓపెనింగ్స్‌ ఎలా ఉంటాయా అంటూ అంతా ఆసక్తిగా ఎదురు చూస్తున్నారు.