208 కేజీల నుంచి 100 కేజీల‌కు.. అంబానీ వెయిట్ లాస్ స్టోరి!
ఆ స‌మ‌యంలో తన త‌ల్లిదండ్రులు త‌న‌కు ఎలా అండ‌గా నిలిచారో మాట్లాడుతుండ‌గా ముఖేష్ అంబానీ క‌న్నీళ్ల ప‌ర్యంతం అయ్యారు.
ఆసియా రిచెస్ట్ బిజినెస్‌మేన్, రిలయన్స్ ఇండస్ట్రీస్ చైర్మన్ ముఖేష్ అంబానీ చిన్న కుమారుడు అనంత్ అంబానీ తన స్నేహితురాలు రాధిక మర్చంట్‌ని పెళ్లాడిన సంగ‌తి తెలిసిందే. ఈ జంట నిశ్చితార్థం జ‌న‌వ‌రిలో జ‌రిగింది. జామ్ న‌గ‌ర్ లో మొద‌టి ప్రీవెడ్డింగ్ వేడుక‌లు, ఇట‌లీ క్రూయిజ్ షిప్ లో రెండో ప్రీవెడ్డింగ్ వేడుక‌లు జ‌రిగాయి. జూలై 12న ఈ జంట పెళ్లి ముంబై జియోవ‌ర‌ల్డ్ సెంట‌ర్ లో అత్యంత వైభ‌వంగా జ‌రిగింది. ఈ వేడుక‌ల‌కు ప్ర‌పంచ‌వ్యాప్తంగా ఉన్న దిగ్గ‌జాలు ఎటెండ‌య్యారు. సినీసెల‌బ్రిటీల సంద‌డితో ఉత్సాహం నెల‌కొంది. అయితే అనంత్ అంబానీ ప్రీవెడ్డింగ్ వేడుక‌ల్లో తన అనారోగ్య స‌మ‌స్య‌లు, అధిక బరువు క‌ష్టం గురించి మాట్లాడారు. ఆ స‌మ‌యంలో తన త‌ల్లిదండ్రులు త‌న‌కు ఎలా అండ‌గా నిలిచారో మాట్లాడుతుండ‌గా ముఖేష్ అంబానీ క‌న్నీళ్ల ప‌ర్యంతం అయ్యారు. ఒక తండ్రిగా అతడి ఆవేద‌న అంద‌రి హృద‌యాల‌ను కదిలించింది.
ఆ త‌ర్వాత అనంత్ అంబానీ అనారోగ్య స‌మ‌స్య గురించి అంత‌ర్జాలంలో విస్త్ర‌తంగా చ‌ర్చ సాగింది. అనంత్ కి తీవ్ర‌మైన ఉబ్బసం ఉంది. దాని వల్ల చాలా స్టెరాయిడ్‌లు తీసుకోవలసి వచ్చింది. అతడు ఊబకాయంతో బాధపడుతున్నాడు. ఆస్తమా చికిత్స ఫలితంగా చాలా బరువు పెరిగాడు. అనంత్ బరువు దాదాపు 208 కిలోలు ఉండేది. ఉబ్బసం ఊపిరితిత్తుల స‌మ‌స్య‌లు వ్యాయామం చేయడం లేదా చురుకుగా ఉండటాన్ని మరింత కష్టతరం చేస్తాయి. దీర్ఘకాలికంగా స్టెరాయిడ్స్ తీసుకోవడం వల్ల సాధారణం కంటే ఆకలిగా అనిపించవచ్చు. ఇది బరువు పెరగడానికి దారితీస్తుంది. నోటి స్టెరాయిడ్స్ తీసుకోవడం వల్ల ద్రవం నిలుపుకోవడం కూడా బరువు పెరగడానికి దారితీసే స‌మ‌స్య. అయితే తన స‌మ‌స్య‌ను త‌గ్గించుకునేందుకు అనంత్ రోజూ ఐదు-ఆరు గంటల పాటు వ్యాయామం చేసేవాడు. అతని రోజువారీ వ్యాయామ నియమావళిలో 21-కి.మీ నడక, యోగా, వెయిట్ ట్రైనింగ్, ఫంక్షనల్ ట్రైనింగ్ ..హై-ఇంటెన్సిటీ కార్డియో వ్యాయామాలు ఉన్నాయి. అనంత్ జీరో షుగర్, హై ప్రొటీన్ తక్కువ కొవ్వుతో తక్కువ కార్బ్ డైట్‌కి మారాడు. అతడు ప్రతిరోజూ 1200-1400 కేలరీలు వినియోగిస్తున్నాడు. అతడి స్వచ్ఛమైన ఆహారంలో తాజా ఆకుపచ్చ కూరగాయలు, కాయధాన్యాలు, మొలకలు, పప్పులు, పనీర్, పాల ఉత్పత్తులు ఉన్నాయి. తన బరువు తగ్గించే ప్రయాణంలో అతడు అన్నిర‌కాల జంక్ ఫుడ్స్‌ను వదులుకున్నాడు.
ఆరోగ్యకరమైన ఆహారం తీసుకోవడం.. కఠినమైన వ్యాయామ దినచర్యతో పాటు అనంత్ అంబానీ ఒక ప్రణాళికాబద్ధమైన ఫిట్‌నెస్ ప్రోగ్రామ్‌ను అనుస‌రిస్తాడు. ఫిట్‌నెస్ ట్రైనర్ వినోద్ చన్నా అతడి కోసం వర్కౌట్ ప్రోగ్రామ్‌ను ప్లాన్ చేయడానికి ముందు చాలా పరిశోధనలు చేయాల్సి వచ్చింది. 16 వర్కవుట్ టెక్నిక్‌లలో నిపుణుడు అయిన అతడు పలువురు బాలీవుడ్ ప్రముఖులకు శిక్షకుడు. అతడు మెడిసిన్ అవస‌రం లేకుండా అనంత్ బరువు తగ్గడానికి సహాయపడే ఒక ప్రోగ్రామ్‌ను డిజైన్ చేశాడు.
అదే క్ర‌మంలో అనంత్ 18 నెలల్లో 108 కిలోలు తగ్గాడు. రాధిక మర్చంట్ పుట్టినరోజు వేడుకల నుండి లీక్ అయిన 2020 వీడియో ఫుటేజ్‌లో అనంత్ తిరిగి బరువు పెరిగినట్లు నెటిజన్ లు గమనించారు. డిసెంబర్ 2022లో ఇషా అంబానీకి జ‌న్మించిన కవల పిల్లలను అంబానీలు స్వాగతిస్తున్న వీడియోలు సోషల్ మీడియాలో వైరల్ అయినప్పుడు కూడా ఇదే గమనించారు. అనంత్ బరువు పెరగడంపై ట్రోలింగ్ జ‌రిగింది. అయితే అనంత్ ప‌ట్టుద‌ల‌గా కేవ‌లం 18 నెల‌ల్లోనే 108 కిలోలు తగ్గాడు. అతడు 208 కిలోల నుంచి దాదాపుగా 100 కిలోల‌కు తగ్గాడు. ఓవైపు ఇన్ హేల‌ర్స్ ఉప‌యోగిస్తూనే బరువు త‌గ్గేందుకు అతడు ప్ర‌యాస ప‌డ్డాడు.