కోవిడ్ నేపథ్యంలో వెనక్కి తగ్గిన చిరంజీవి.. 'ఆచార్య' వాయిదా..!

మెగాస్టార్ చిరంజీవి - దర్శకుడు కొర‌టాల శివ కాంబినేష‌న్‌ లో రూపొందుతోన్న తాజా చిత్రం ''ఆచార్య‌''. మెగా పవర్ స్టార్ రామ్ చరణ్ ఇందులో కీలక పాత్ర పోషిస్తున్నాడు. కొణిదెల ప్రొడక్షన్స్ సమర్పణలో మాట్నీ ఎంటర్‌టైన్మెంట్స్ బ్యానర్ పై నిరంజన్ రెడ్డి ఈ చిత్రాన్ని నిర్మిస్తున్నారు. ఇప్పటికే మెజారిటీ భాగం షూటింగ్ జరుపుకున్న ఈ చిత్రాన్ని మే 13న విడుద‌ల చేయ‌బోతున్న‌ట్లు నిర్మాత‌లు ప్ర‌క‌టించారు. అయితే ప్రస్తుతం నెలకొన్న పరిస్థితుల నేపథ్యంలో 'ఆచార్య' సినిమాని చెప్పిన తేదీకి రిలీజ్ చేయడం లేదని మేకర్స్ అధికారికంగా ప్రకటించారు.

కరోనా విజృంభన కారణంగా ఇప్పటికే 'ఆచార్య' సినిమా షూటింగ్ నిలిచిపోయింది. ఈ క్రమంలో మహమ్మారి పరిస్థితిని దృష్టిలో ఉంచుకుని 'ఆచార్య' చిత్రాన్ని మే 13న విడుదల చేయడం లేదని.. ప్రస్తుతానికి వాయిదా వేస్తున్నామని చిత్ర యూనిట్ ప్రకటించారు. పరిస్థితులు చక్కబడిన తర్వాత కొత్త విడుదల తేదీని ప్రకటిస్తామని తెలిపారు. కోవిడ్ సెకండ్ వేవ్ నేపథ్యంలో ఇప్పటికే అనేక సినిమాలు వాయిదా పడిన సంగతి తెలిసిందే. అయితే ప్రస్తుతానికి పోస్ట్ పోన్ చేసిన సినిమాలలో భారీ బడ్జెట్ చిత్రం 'ఆచార్య' అని చెప్పవచ్చు.

కాగా, 'ఆచార్య' సినిమాలో చిరంజీవికి జోడీగా కాజల్ అగర్వాల్.. చరణ్ సరసన పూజాహెగ్డే నటిస్తున్నారు. రెజీనా కసండ్రా ఓ స్పెషల్ సాంగ్ లో కనిపించనుంది. ఇప్పటికే విడుదలైన ఫస్ట్ లుక్ - సాంగ్ మంచి స్పందన తెచ్చుకున్నాయి. ఈ చిత్రానికి మణిశర్మ సంగీతం సమకూరుస్తున్నారు. సురేష్ సెల్వరాజన్ ప్రొడక్షన్ డిజైనర్ గా వ్యవహరించగా.. తిరు సినిమాటోగ్రఫీ అందిస్తున్నారు. నవీన్ నూలి ఎడిటింగ్ వర్క్ చేస్తున్నారు. చిరంజీవి - చరణ్ కలిసి నటిస్తున్న 'ఆచార్య' సినిమాపై భారీ అంచనాలు ఉన్నాయి.