‘బాబు బాగా బిజీ’ టైపు క్యారెక్టర్లు చేయదట

అవసరాల శ్రీనివాస్ హీరోగా నటించిన ‘బాబు బాగా బిజీ’ సినిమా గత శుక్రవారమే ప్రేక్షకుల ముందుకొచ్చింది. బాలీవుడ్ అడల్ట్ కామెడీ ‘హంటర్’కు రీమేక్ గా వచ్చిన ఈ సినిమాకు నెగెటివ్ టాక్ వచ్చింది. పైగా ‘బాహుబలి: ది కంక్లూజన్’ ప్రభంజనం సాగుతున్న టైంలో ఈ సినిమా రావడం కూడా ప్రతికూలమైంది. అడల్ట్ కంటెంట్ వల్ల సినిమాకు ఓపెనింగ్స్ వచ్చినా.. ఎక్కువ రోజులైతే థియేటర్లలో నిలిచేలా లేదు. ఇక ఈ సినిమా జనాల్ని ఆకర్షించడానికి ప్రధాన కారణం.. అందులో అవసరాల శ్రీనివాస్ ఒక ఆంటీతో ఎఫైర్ నడిపే ఎపిసోడే. సినిమాలో హైలైట్ గా నిలిచింది కూడా ఆ ఎపిసోడే. ఆ ఎపిసోడ్లో ఆంటీగా నటించిన అమ్మాయి సుప్రియ ఐసోలా.

సుప్రియ బ్యాగ్రౌండ్ ఆసక్తి రేకెత్తించేదే. ఆమె బాగా చదువుకుని సినిమాల వైపు అడుగులేసింది. సుప్రియ జర్నలిజం అండ్ మాస్ కమ్యూజినకేషన్లో పోస్ట్ గ్రాడ్యుయేషన్ చేయడం విశేషం. ఆ తర్వాత థియేటర్ ఆర్టిస్టుగా తన ప్రస్థానం ఆరంభించింది. ఇలాంటి నేపథ్యమున్న సుప్రియ ‘బాబు బాగా బిజీ’లో అలాంటి క్యారెక్టర్ చేయడం ఆశ్చర్యం కలిగించే విషయమే. ఐతే తాను ఆ క్యారెక్టర్ని మరోలా చూడలేదని.. ఒక ఆర్టిస్టుగా ఎలాంటి పాత్ర అయినా చేయడం తన కర్తవ్యమని అంటోంది సుప్రియ. ఐతే ఇకముందు అలాంటి క్యారెక్టర్లు చేయాలనుకోవడం లేదని సుప్రియ తెలిపింది. అదే తరహా క్యారెక్టర్లు చేస్తే తనకు వేరే ఇమేజ్ వస్తుందని.. కాబట్టి ఇకపై భిన్నమైన పాత్రలు చేయాలనుకుంటున్నానని ఆమె చెప్పింది. ‘బాబు బాగా బిజీ’ తర్వాత తనకు మంచి అవకాశాలే వస్తాయని ఆశిస్తున్నానని.. త్వరలోనే కొత్త ప్రాజెక్టుల వివరాలు చెబుతానని ఆమె అంది.