ఎయిర్ టెల్ పిల్లతో జత కట్టేది ఎవరంటే..

ఎయిర్ టెల్ 4జీ ప్రకటనతో దేశవ్యాప్తంగా పాపులారిటీ సంపాదించిన ఉత్తరాది అమ్మాయి షాషా చెత్రి త్వరలోనే సినిమాల్లోకి కూడా అడుగుపెట్టేస్తున్న సంగతి తెలిసిందే. ఈ అమ్మాయికి తెలుగులో కథానాయికగా అవకాశం దక్కడం విశేషం. ‘వినాయకుడు’.. ‘విలేజ్‌ లో వినాయకుడు’.. ‘కేరింత’ లాంటి సినిమాలు తీసిన సాయికిరణ్ అడివి షాషాకు తొలి అవకాశం ఇస్తున్నాడు. కొన్నాళ్లుగా ఈ చిత్రం కోసం కథానాయకుడి వేట సాగించాడు సాయికిరణ్. ఎట్టకేలకు అతడి ప్రయత్నం ఫలించింది. సాయికుమార్ తనయుడు ఆది ఈ చిత్రంలో షాషాకు జోడీగా నటించబోతున్నట్లు సమాచారం.

కెరీర్ ఆరంభంలో ‘ప్రేమ కావాలి’.. ‘లవ్లీ’ లాంటి యావరేజ్ సినిమాలు చేసిన ఆది.. ఆ తర్వాత వరుస ఫ్లాపులతో సతమతమవుతున్నాడు. చివరగా అతను నటించిన ‘నెక్స్ట్  నువ్వే’ అట్టర్ ఫ్లాప్ అయింది. ఇప్పుడు అతడికి పెద్దగా అవకాశాలు కూడా లేవు. ఇలాంటి టైంలో సాయికిరణ్ దర్శకత్వంలో నటించబోతున్నాడు ఆది. సాయికిరణ్ పరిస్థితి కూడా ఏమంత బాగా లేదు. తొలి సినిమా ‘వినాయకుడు’ తర్వాత అతను స్ట్రగులవుతున్నాడు. దిల్ రాజు నిర్మాణంలో అతను చేసిన ‘కేరింత’ కూడా ఆశించిన ఫలితాన్నివ్వలేదు. సాయికిరణ్.. ఆది.. షాషా.. ఈ ముగ్గురికీ ఈ చిత్రం కీలకమే. త్వరలోనే ఈ చిత్రం సెట్స్ మీదికి వెళ్లనుంది.