రానా, అక్షయ్ కుమార్.. ఓ తెలుగు సినిమా

ఈ హెడ్డింగ్ చదివి రానా దగ్గుబాటి, అక్షయ్ కుమార్ కలిసి నటించిన ఏ హిందీ సినిమానో తెలుగులోకి డబ్ చేసి రిలీజ్ చేసేస్తున్నారేమో అని అనుకోకండి. ఈ సినిమా వాళ్లు నటించింది కాదు, నటించబోయేదీ కదు. వాళ్లిద్దరూ కలిసి నిర్మించబోతున్న సినిమా. రానా నటుడు కావడాని కంటే ముందు నిర్మాత అన్న సంగతి తెలిసిందే. కొన్ని షార్ట్ ఫిలిమ్స్ తీసి తన అభిరుచిని చాటుకున్నాడు. సురేష్ ప్రొడక్షన్ సంస్థలో ప్రొడక్షన్ వ్యవహారాలు చూశాడు. ఈ అనుభవంతోనే తన బాలీవుడ్ మిత్రుడు అక్షయ్ కుమార్ తో కలిసి ఫీచర్ ఫిలిం నిర్మాణంలోకి దిగాలని డిసైడయ్యాడు రానా. బేబీ సినిమాలో వీళ్లిద్దరూ కలిసి నటించిన సంగతి తెలిసిందే.

రానా, అక్షయ్ కలిసి బాలీవుడ్ లో కాకుండా టాలీవుడ్ లో సినిమా నిర్మించాలని నిర్ణయించుకోవడం విశేషమే. వీళ్లిద్దరూ ‘పోస్టర్ బాయ్స్’ అనే సినిమాను అనౌన్స్ చేశారు. ఈ మూవీకి గోపీ గణేష్ దర్శకత్వం వహించనుండగా, డార్లింగ్ స్వామి స్క్రిప్టు సమకూరుస్తున్నాడు. ఈ ఇంట్రెస్టింగ్ ప్రాజెక్టు గురించి రానా తన ట్విట్టర్ ఎకౌంట్ ద్వారా వెల్లడించాడు. ఓ మరాఠీ సూపర్ హిట్ సినిమాకు రీమేకే ఈ పోస్టర్ బాయ్స్ అని కూడా రానా చెప్పాడు. ఈ సినిమా కోసం నటీనటుల్ని వెతుకుతున్నామని.. కాస్టింగ్ కాల్ కూడా ఇచ్చామని వెల్లడించాడు రానా. టాలెంట్ ఉన్నవాళ్లు తమ ప్రొడక్షన్ హౌజ్ ను సంప్రదించాలని కోరాడు. మొత్తానికి ఎవ్వరూ ఊహించని విధంగా అక్షయ్ కుమార్ తో కలిసి నిర్మాతగా రానా అరంగేట్రం చేయబోతుండటం విశేషమే.