రంగమ్మత్త ని ఈసారి అలాంటి పాత్రలో చూపిస్తున్నారా..?

సుకుమార్‌ దర్శకత్వంలో తెరకెక్కిన ‘రంగస్థలం’ సినిమాలో యాంకర్ అనసూయ కీలక పాత్రలో నటించిన సంగతి తెలిసిందే. ఆమె పోషించిన రంగమ్మత్త రోల్ మంచి పేరు తెచ్చిపెట్టడమే కాకుండా, ఆమె కెరీర్‌ బిజీగా మారడానికి ఎంతో ఉపయోగపడింది. ఈ క్రమంలో అనసూయ కోసం సుకుమార్ మరోసారి కీలక పాత్రని సృష్టించినట్టు తెలుస్తోంది. ఆయన ప్రస్తుతం అల్లు అర్జున్‌ - రష్మిక మందన్నా హీరోహీరోయిన్లుగా ''పుష్ప'' చిత్రాన్ని తెరకెక్కిస్తున్న సంగతి తెలిసిందే. ఇందులో అనసూయ ఓ కీలక పాత్ర పోషిస్తోంది. ఈ విషయాన్ని సోషల్ మీడియా ద్వారా అనసూయ స్వయంగా వెల్లడించారు. ప్రస్తుతం సుక్కూ ఆమెపై కొన్ని కీలక సన్నివేశాల్ని చిత్రీకరిస్తున్నారని తెలుస్తోంది.

ఈ నేపథ్యంలో 'పుష్ప' సినిమాలో అనసూయ రోల్ ఎలా ఉండబోతుందా అనే ఆసక్తి అందరిలో ఎక్కువైంది. 'రంగస్థలం' తరహాలోనే ఈ చిత్రంలో కూడా అనసూయ పాత్రకు ప్రాధాన్యత ఉంటుందట. అయితే అందులో రంగమ్మత్త క్యారక్టర్ కాస్త ఎమోషనల్ గా సాగగా.. ఇందులో సుక్కూ ఆమె పాత్ర పవర్ ఫుల్ గా డిజైన్ చేసినట్టు టాక్ నడుస్తోంది. మరి ఈ అందాల యాంకర్ ఈసారి ఎలా సందడి చేస్తుందో చూడాలి. ఇకపోతే అనసూయ 'పుష్ప' తో పాటుగా రవితేజ ‘ఖిలాడి’..  కృష్ణవంశీ దర్శకత్వంలో ‘రంగమార్తాండ’ చిత్రాల్లో నటిస్తోంది. అలాగే అనసూయ ప్రధాన పాత్ర పోషించిన 'థాంక్ యు బ్రదర్' సినిమా విడుదలకు సిద్ధమైంది. ఏదేమైనా అనసూయ ఓ వైపు యాంకర్ గా బుల్లితెరపై సత్తా చాటుతూనే వెండితెరపై నటిగా బిజీ అవుతోందని తెలుస్తోంది.