బాల‌య్య కామెడీలు కుదిరే ప‌నేనా?

న‌ట‌సింహా నంద‌మూరి బాల‌కృష్ణ `గౌత‌మిపుత్ర శాత‌కర్ణి` స‌క్సెస్ త‌ర్వాత స్పీడ్ పెంచిన సంగ‌తి తెలిసిందే. పూరి ద‌ర్శ‌క‌త్వంలో పైసా వ‌సూల్ చిత్రంలో న‌టించారు. అయితే ఆ సినిమా ఆశించిన ఫ‌లితాన్ని ఇవ్వ‌లేదు. ఈ ఏడాది పండ‌గ బ‌రిలో `ఎన్టీఆర్‌- క‌థానాయ‌కుడు` చిత్రంతో ప్రేక్ష‌కాభిమానుల ముందుకు వ‌చ్చారు. ఫిబ్ర‌వ‌రి 7న మ‌హానాయ‌కుడు రిలీజ‌వుతుంది. ఈ సినిమాల త‌ర్వాత బాల‌య్య షెడ్యూల్ పై నంద‌మూరి అభిమానులు ఆస‌క్తిగా ముచ్చ‌టించుకుంటున్నారు.

బాల‌య్య క్యూలో ఇప్ప‌టికే ఇద్ద‌రు ద‌ర్శ‌కులు ఉన్నారు. బోయ‌పాటి శ్రీ‌ను, వి.వి.వినాయ‌క్ క‌థ‌లు వినిపించేందుకు స్క్రిప్టులు రెడీ చేశారు. అయితే ఆ ఇద్ద‌రిలో బోయ‌పాటికి న‌ట‌సింహా గ్రీన్ సిగ్న‌ల్ ఇచ్చేశార‌న్న వార్త‌లు వ‌చ్చాయి. ఎన్టీఆర్ బ‌యోపిక్ త‌ర్వాత బోయ‌పాటితో హ్యాట్రిక్ సినిమా ఉంటుంది. సింహా, లెజెండ్ త‌ర‌హాలో మ‌రో భారీ మాస్ యాక్ష‌న్ ఎంట‌ర్ టైన‌ర్ ఉంటుందిట‌. ఆ త‌ర్వాత బాల‌య్య ఎవ‌రి ద‌ర్శ‌క‌త్వంలో న‌టిస్తారు? అంటే..

ఎలాంటి సందేహం లేకుండా `ప‌టాస్` ఫేం అనీల్ రావిపూడికి ఛాన్స్ ఉంటుంద‌ని తెలుస్తోంది. అనీల్ రావిపూడి వ‌రుస విజ‌యాలతో స్పీడ్ మీదున్నాడు. ప‌టాస్ - రాజా ది గ్రేట్ లాంటి బ్లాక్ బ‌స్ట‌ర్ల త‌ర్వాత ఎఫ్ 2 పాజిటివ్ ఫ‌లితం ఇవ్వ‌డం అత‌డికి ఊపునిచ్చిందిట‌. ఆ క్ర‌మంలోనే త‌దుప‌రి సినిమా ఏం చేస్తున్నారు? అని ప్ర‌శ్నిస్తే బాల‌య్య బాబుకు క‌థ చెబుతాన‌ని అన్నారు. అనీల్ రావిపూడి మాట్లాడుతూ-``పండుగకు ఊరెళ్లి ఎంజాయ్‌ చేసి.. మూడు వారాలు రిలాక్స్‌ అయ్యి వ‌స్తాను. అక్క‌డే ఓ ఐడియా అనుకుని చేస్తాను. బాలకృష్ణకు కూడా ఓ ఐడియా చెప్పాను. ఈసారి ఫుల్‌ లెంగ్త్‌ కామెడీ చేయను. అయితే నా సినిమాల్లో ఫన్‌ లేయర్‌ లేకుండా ఉండదు. ఆద్యంతం న‌వ్విస్తాను`` అని అన్నారు. హిట్టుమీదున్న అనీల్ రావిపూడి కి బాల‌య్య ఓకే చెబితే అత‌డితోనూ కామెడీ చేయిస్తాడా? అన్న‌ది చూడాలి.