గ్యాంగ్ లీడర్' తర్వాత అతని పరిస్థితేంటి?

తమిళ్ లో చిన్న సినిమాలతో స్టార్ మ్యూజిక్ డైరెక్టర్ గా ఎదిగాడు అనిరుద్. కొలవరి డీ అనే పాట అతన్ని ప్రపంచ వ్యాప్తంగా పాపులర్ చేసింది. కోలీవుడ్ లో ప్రస్తుతం స్టార్ హీరోలు సైతం అనిరుద్ మ్యూజిక్ నే కోరుకుంటూ వరుస సినిమాలు చేస్తున్నారు. అయితే కోలీవుడ్ లో బిజీగానే ఉన్నా అనిరుద్ కళ్ళు మాత్రం టాలీవుడ్ మీదే ఉన్నాయి. తెలుగులో పెద్ద సినిమాలు చేస్తూ టాలీవుడ్ లోనూ బిజీ అవ్వాలని భావిస్తున్నాడు.

పవర్ స్టార్ సినిమా 'అజ్ఞాతవాసి' తో టాలీవుడ్ కి ఎంట్రీ ఇచ్చిన అనిరుద్ కి తొలి సినిమాతోనే ఎదురు దెబ్బ తగిలింది. ఆ తర్వాత టాలీవుడ్ ఈ మ్యూజిక్ డైరెక్టర్ ని లైట్ తీసుకుంది. మళ్లీ నాని 'జెర్సీ' తో వచ్చాడు. ఆ సినిమాకు నేపథ్య సంగీతంతో ప్రాణం పోసాడు. పాటలు కూడా ఆకట్టుకున్నాయి. ఇక రిలీజ్ రోజే తెలుగులో మొదటి బ్లాక్ బస్టర్ అని చెప్తూ తనని లైట్ తీసుకున్న వారికోసం రజినీ డైలాగ్ తో ఓ వీడియో క్లిప్ పెట్టాడు. ఈ సినిమాతో తెలుగులో బిజీ అయిపోతాడాని అనుకున్నారు. కట్ చేస్తే వెంటనే తెలుగులో సినిమా రాలేదు. మళ్లీ 'గ్యాంగ్ లీడర్' రూపంలో నానినే ఛాన్స్ ఇచ్చాడు. విక్రమ్ కి అనిరుద్ ని సజెస్ట్ చేసి ఒప్పించాడు.

సో ఇప్పుడు అన్ని ఆశలు 'గ్యాంగ్ లీడర్' మీదే పెట్టుకున్నాడు ఈ యంగ్ మ్యూజిక్ డైరెక్టర్. ఈ సినిమా తర్వాత అయినా తనకి తెలుగులో పెద్ద ఆఫర్ వస్తుందని ఎదురుచూస్తున్నాడు. ఇటీవలే విడుదల చేసిన 'గ్యాంగ్ లీడర్' ఫస్ట్ సాంగ్ పెద్దగా క్లిక్ అవ్వలేదు. రెండో సాంగ్ ను స్వాతంత్ర దినోత్సవం సందర్భంగా రేపు విడుదల చేస్తున్నారు. మరి ఈ సాంగ్ అయినా క్లిక్ అవుతుందా చూడాలి.