టాలీవుడ్ స్టార్ హీరోకి బాలీవుడ్ నుంచి మరో బంఫర్ ఆఫర్..?

'కింగ్' అక్కినేని నాగార్జున చాలా గ్యాప్ తర్వాత హిందీలో కీలక పాత్ర పోషిస్తున్న చిత్రం 'బ్రహ్మాస్త్ర'. బాలీవుడ్ స్టార్స్ రణబీర్ కపూర్ - అమితాబ్ బచ్చన్ - అలియా భట్ - మౌని రాయ్ ఈ చిత్రంలో ఇతర ప్రధాన పాత్రల్లో నటిస్తున్నారు. ఫాక్స్‌ స్టార్‌ స్టూడియోస్‌ మరియు ధర్మ ప్రొడక్షన్స్‌ సంస్థలు సంయుక్తంగా నిర్మిస్తున్న ఈ చిత్రానికి అయాన్‌ ముఖర్జీ దర్శకత్వం వహిస్తున్నారు. సుమారు రూ.300 కోట్ల భారీ బడ్జెట్‌ తో తెరకెక్కుతున్న ఈ చిత్రం పాన్ ఇండియా లెవల్ లో విడుదల కానుంది. ఇందులో నాగ్ ఆర్కియాలజిస్టు పాత్రలో కనిపించనున్నారని సమాచారం. ఇటీవలే నాగార్జున 'బ్రహ్మాస్త్ర' సినిమాలో తన పాత్రకు సంబంధించిన షూటింగ్ పూర్తి చేశాడు. అయితే మ‌ళ్లీ బాలీవుడ్ లోకి అడుగుపెట్టిన కింగ్ నాగ్ కి ఇప్పుడు బాంబే నుంచి పెద్ద ఎత్తున కాల్స్ రావ‌డం మొదలైందని బీ టౌన్ వర్గాలు చెబుతున్నాయి.

టాలీవుడ్ స్టార్ హీరోల్లో ఒకరైన నాగార్జున బాలీవుడ్ లో 'శివ' 'ఖుదాగవా' 'ద్రోహి' 'క్రిమినల్' 'జక్మ్' 'అగ్ని వర్ష' 'ఎల్ ఓ సీ కార్గిల్' వంటి చిత్రాల్లో నటించి మెప్పించాడు. అయితే 2003 తర్వాత హిందీ సినిమాల్లో నటించడానికి పెద్దగా ఆసక్తి చూపించని నాగ్.. ఇప్పుడు 'బ్రహ్మాస్త్ర' సినిమాతో రీ ఎంట్రీ ఇస్తున్నాడు. ఈ నేపథ్యంలో టాలీవుడ్ మన్మథుడుకి మళ్ళీ హిందీలో వరుస ఆఫర్స్ వస్తున్నాయట. తాజాగా స్టార్ హీరో ర‌ణ్ వీర్ సింగ్ చేయ‌బోతున్న ఓ మూవీలో నాగ్ కి కాస్త నెగిటివ్ షేడ్స్ ఉన్న ఓ రోల్ ఆఫ‌ర్ వ‌చ్చింద‌ట‌. నెగిటివ్ షేడ్స్ అయినప్పటికీ హీరోకి థీటుగా ఉండే ఆ క్యారెక్ట‌ర్.. 'ధూమ్' సినిమాలో హృతిక్ రోషన్ పాత్ర మాదిరి ఉంటుంద‌ని బాలీవుడ్ వ‌ర్గాల స‌మాచారం. అయితే నాగార్జున మాత్రం ప్ర‌స్తుతానికి ఆ ఆఫర్ ని హోల్డ్ లో పెట్టారట. గతంలో నాగ్ మాట్లాడుతూ నెగిటివ్ షేడ్స్ ఉన్న పాత్ర అయినప్పటికీ హీరోకి ధీటుగా ఉండే రోల్ అయితే నటించడానికి అభ్యంతరం లేదని చెప్పిన సంగతి తెలిసిందే. మరి ఇప్పుడు తెలుగులో హీరోగా సినిమాలు చేస్తున్న నాగ్ అలాంటి పాత్రలో నటించడానికి గ్రీన్ సిగ్నల్ ఇస్తాడా లేదా అన్నది చూడాలి.