అశ్వథ్థామ ట్రీట్ కి ఫ్యాన్స్ సిద్ధ‌మా?

ట్యాలెంటెడ్ హీరో నాగ శౌర్య `ఛ‌లో` లాంటి బ్లాక్ బ‌స్ట‌ర్ త‌ర్వాత మ‌ళ్లీ అలాంటి విజ‌యం కోసం చాలా కాలంగా వేచి చూస్తున్నాడు. ప్ర‌తిసారీ ఏదో ఒక కొత్త‌ద‌నం కోసం త‌పిస్తున్నాడు. ఆ కోవ‌లోనే అత‌డు న‌టిస్తున్న తాజా చిత్రం `అశ్వథామ`. ఈ చిత్రంతో రమణ తేజ ద‌ర్శ‌కుడి గా ప‌రిచ‌యం అవుతున్నారు. వైజాగ్ నేపథ్యం లో నడిచే ఆస‌క్తిక‌ర క‌థాంశ‌మిది. సంఘంలో అరాచ‌కాలు పెరిగిన నేప‌థ్యం లో ఆ అన్యాయాలను ప్రశ్నించే యువకుడిగా నాగ శౌర్య క‌నిపించ‌ బోతున్నాడు. ఒక ర‌కంగా యాక్ష‌న్ కి ఆస్కారం ఉన్న క‌థాంశ‌మిది. అందుకు త‌గ్గ‌ట్టే లుక్ ని మార్చాడు.

ఒక మాస్ హీరోని త‌ల‌పించేలా భీక‌ర‌మైన లుక్ కి మారాడు. ఇక ఈ చిత్రంలో చొక్కా విప్పి 6ప్యాక్ ఆవిష్క‌రించ‌బోతున్నాడ‌న్న‌ది యువ‌త‌రంలో హాట్ టాపిక్ గా మారింది. ఇప్ప‌టికే రిలీజైన పోస్ట‌ర్లు శౌర్య‌లోని మాసిజాన్ని ఎలివేట్ చేశాయి. తాజాగా ఈ మూవీ టీజర్ కి తేదీ ఫిక్స‌య్యింది. ఈనెల 27న ఉదయం 11:07 గంటలకు ఈ చిత్ర టీజర్ విడుదల చేయనున్నారు. ఆ మేర‌కు అధికారిక ప్ర‌క‌ట‌న వెలువ‌డింది. తాజా పోస్ట‌ర్ లో శౌర్య యాక్ష‌న్ మోడ్ ని ఆవిష్క‌రించారు.

ఛ‌లో- న‌ర్త‌న‌శాల త‌ర్వాత‌ ఐరా క్రియేషన్స్ బ్యానర్ పై ఉషా ములుపురి ఈ చిత్రాన్ని నిర్మిస్తున్నారు. నాగ శౌర్య కు జంటగా మెహ్రీన్ క‌థానాయిక‌. శ్రీ చరణ్ పాకల్ సంగీతం అందిస్తున్నారు. 2020 జనవరి 31న సినిమా విడుదల కానుంది. జ‌న‌వ‌రి 1 మొద‌లు నెల‌ రోజుల పాటు ప్ర‌చారం లో అశ్వ‌ద్ధామ టీమ్ స్పీడ్ పెంచేందుకు ప్ర‌ణాళిక‌ల్లో ఉన్నారు.