పోల్ రిపోర్ట్: శివరాత్రికి విడుదలయ్యే సినిమాలలో ఆడియన్స్ ఫస్ట్ ఛాయిస్..?

మహాశివరాత్రి పర్వదినాన్ని పురస్కరించుకుని టాలీవుడ్ లో సినిమాల జాతర మొదలు కానుంది. రేపు ఒక్కరోజే మూడు తెలుగు సినిమాలతో పాటుగా ఓ డబ్బింగ్ మూవీ కూడా ప్రేక్షకుల ముందుకు వస్తున్నాయి. 'శ్రీకారం' 'జాతిరత్నాలు' 'గాలి సంపత్' 'రాబర్ట్' సినిమాలు ఈ గురువారం విడుదల అవుతున్నాయి. కన్నడ డబ్బింగ్ సినిమా మినహా మిగతా మూడు సినిమాలు ఇప్పటికే బజ్ క్రియేట్ చేశాయి. ఈ నేపథ్యంలో పబ్లిక్ ఒపీనియన్ తెలుసుకోడానికి 'మహా శివరాత్రికి విడుదలయ్యే సినిమాలలో మీ ఫస్ట్ ఛాయిస్ ఏది?' అని 'తుపాకీ డాట్ కామ్' ఓ పోల్ నిర్వహించింది.

నవీన్ పోలిశెట్టి - రాహుల్ రామకృష్ణ - ప్రియదర్శి ప్రధాన పాత్రలతో తెరకెక్కుతున్న కామెడీ ఎంటర్టైనర్ ''జాతిరత్నాలు'' కోసం ఆడియన్స్ ఆసక్తిగా ఎదురుచూస్తున్నట్లు ఈ పోల్ ని బట్టి తెలుస్తోంది. అనుదీప్ కేవీ దర్శకత్వంలో నాగ్‌ అశ్విన్‌ నిర్మిస్తున్న ఈ చిత్రానికి 54.97% మంది ఓటేసారు. అలానే శర్వానంద్ - ప్రియాంక అరుళ్ మోహన్ జంటగా నటించిన ''శ్రీకారం'' చిత్రాన్ని ఫస్ట్ ఛాయిస్ గా 27.75% మంది ఎన్నుకున్నారు. బి.కిశోర్ రెడ్డి తెరకెక్కిస్తున్న ఈ చిత్రాన్ని 14 రీల్స్ ప్లస్ బ్యానర్ పై రామ్ ఆచంట - గోపీ ఆచంట కలసి నిర్మించారు. ఇక అనిల్ రావిపూడి దర్శకత్వ పర్యవేక్షణలో శ్రీవిష్ణు - రాజేంద్రప్రసాద్ ప్రధాన పాత్రతో తెరక్కించిన ''గాలి సంపత్'' చిత్రానికి 5.27% మంది ఓటు వేశారు. 10.25% మంది సినిమా టాక్ ని బట్టి డిసైడ్ అవుతామని చెప్పగా.. 1.76% మంది ఏమో చెప్పలేమనే అభిప్రాయంలో ఉన్నట్లు ఈ పోల్ ద్వారా తెలిసింది. మరి ఈ చిత్రాలలో ఏవి ప్రేక్షకులను మెప్పించి సూపర్ హిట్స్ గా నిలుస్తాయో చూడాలి.