అవసరాల హీరోగా ఇంకో సినిమా

కమెడియన్ గా పరిచయమై.. అనూహ్యంగా దర్శకుడిగా మారి.. ఈ తరం తెలుగు ప్రేక్షకుల ఫేవరెట్ డైరెక్టర్లలో ఒకడైపోయాడు అవసరాల శ్రీనివాస్. అతడి తొలి సినిమా ‘ఊహలు గుసగుసలాడే’ మన ప్రేక్షకులకు పెద్ద సర్ప్రైజే. ఈ సినిమా తర్వాత అవసరాల మీద మంచి అంచనాలు ఏర్పడ్డాయి. ‘జ్యో అచ్యుతానంద’తో ఆ అంచనాల్ని అందుకుంది. దీని తర్వాత డైరెక్టర్ అవసరాల నుంచి మరో సినిమా ఆశిస్తుంటే.. అతనేమో అనుకోకుండా హీరో అయిపోయాడు. ఇప్పటిదాకా సహాయ పాత్రలే చేస్తూ వచ్చిన అవసరాల.. ‘హంటర్’ రీమేక్ ‘బాబు బాగా బిజీ’తో హీరో అవతారం ఎత్తుతున్న సంగతి తెలిసిందే. ఈ సినిమా పూర్తి కాగానే మళ్లీ దర్శకుడిగా తన తర్వాతి సినిమా ఉంటుందని అవసరాల చెప్పాడు.

ఐతే అవసరాల హీరోగా ఇంకో సినిమా లైన్లోకి వచ్చేసింది. విజయ్ అనే కొత్త దర్శకుడితో అవసరాల సినిమా చేయబోతున్నాడట. ఈ చిత్రంలో రెజీనా కథానాయికగా నటించబోతున్నట్లు సమాచారం. నిజానికి ‘బాబు బాగా బిజీ’లోనే రెజీనా ఓ కీలక పాత్ర చేయాల్సింది. ఐతే ముందు ఆమెను కథానాయికగా అనుకుని.. తర్వాత ఆ స్థానంలో మిస్త్రీ చక్రవర్తిని తీసుకున్నారు. ఇప్పుడు అవసరాల-రెజీనా కాంబినేషన్ తెరమీదికి వచ్చింది. అవసరాల డైరెక్షన్లో వచ్చిన ‘జ్యో అచ్యుతానంద’లో రెజీనానే హీరోయిన్ అన్న సంగతి తెలిసిందే. ఈ చిత్రం వచ్చే ఏడాది ద్వితీయార్ధంలో సెట్స్ మీదికి వెళ్తుందట. ఈ లోపు దర్శకుడిగా తన మూడో సినిమాను అవసరాల పూర్తి చేసే అవకాశముంది. అతను నాని హీరోగా సినిమాను తెరకెక్కించే అవకాశముంది.

Like Us on Facebook : https://www.facebook.com/Tupakidotcom/