జై సింహా.. ఇంకో ట్రైలర్ వస్తోంది

‘పైసా వసూల్’ సినిమా పూర్తి చేయడం ఆలస్యం.. ‘జై సింహా’ కోసం రంగంలోకి దిగిపోయాడు నందమూరి బాలకృష్ణ. శరవేగంగా ఈ చిత్ర షూటింగ్ పూర్తి చేసి సంక్రాంతి రేసులో నిలిచాడు. కొంచెం లేటుగా ప్రమోషన్లలోకి దిగినప్పటికీ.. ప్రచారం ఉద్ధృతంగానే చేశారు. టీజర్.. ట్రైలర్ తక్కువ వ్యవధిలో రిలీజ్ చేశారు. ఆడియో లాంచ్ కూడా పూర్తయింది. బాలయ్య నుంచి ఆశించే మాస్ అంశాలకు ఈ సినిమాలో లోటు లేదని టీజర్.. ట్రైలర్ చూస్తే అర్థమైంది. ఇక రిలీజ్ డేట్ దగ్గర పడుతున్న నేపథ్యంలో ప్రమోషన్ జోరు ఇంకాస్త పెంచాలని చిత్ర బృందం భావిస్తోంది. ఇందుకోసమే ఈ రోజు హైదరాబాద్ లోని దసపల్లాలో ప్రి రిలీజ్ ఈవెంట్ ఏర్పాటు చేశారు.

ఈ సందర్భంగా ‘జై సింహా’ కొత్త ట్రైలర్ ఒకటి రిలీజ్ చేస్తుండటం విశేషం. దీనికి ‘ప్రి రిలీజ్ ట్రైలర్’ అని పేరు పెట్టారు. ఇప్పటికే రిలీజైన టీజర్.. ట్రైలర్లలో మాస్ అంశాలే హైలైట్ అయ్యాయి. ఐతే ‘జై సింహా’లో సెంటిమెంటుకు బాగా చోటుందట. తల్లి-బిడ్డ నేపథ్యంలో ఇందులో సెంటిమెంటు గట్టిగా దట్టించారట. ఫ్యామిలీ ఆడియెన్స్ ను ఆకర్షించేలా ఈ అంశాలు హైలైట్ అయ్యేలా కొత్త ట్రైలర్ తీర్చిదిద్దినట్లు సమాచారం. రాత్రి 8 గంటలకు ‘జై సింహా’ ప్రి రిలీజ్ ట్రైలర్ రిలీజవుతుంది. రేపు లేదా విడుదలకు ముందు రోజు బాలయ్య మీడియాను కలిసి ప్రత్యేక ఇంటర్వ్యూలు కూడా ఇస్తారని సమాచారం. కె.ఎస్.రవికుమార్ దర్శకత్వంలో తెరకెక్కిన ఈ చిత్రానికి సి.కళ్యాణ్ నిర్మాత. బాలయ్య సరసన నయనతార.. హరిప్రియ.. నటాషా నటించారు. ఈ చిత్రం జనవరి 12న శుక్రవారం ప్రేక్షకుల ముందుకొస్తుంది.