ఫిబ్రవరిలో కాదు.. వేసవికి దిగుతాడట

పెద్ద బ్యాగ్రౌండేమీ లేకున్నా.. కెరీర్ ఆరంభంలోనే వి.వి.వినాయక్.. బోయపాటి శ్రీను లాంటి బడా డైరెక్టర్లతో సినిమాలు చేశాడు బెల్లంకొండ శ్రీనివాస్. ఇప్పుడతను శ్రీవాస్ లాంటి మరో ప్రముఖ దర్శకుడితో ‘సాక్ష్యం’ అనే సినిమా చేస్తున్నాడు. ఈ చిత్ర ఫస్ట్ లుక్ రిలీజ్ చేసినపుడు ఫిబ్రవరి 9న రిలీజ్ అని ప్రకటించిన సంగతి తెలిసిందే. ఐతే ఇప్పుడు తన సినిమా ఫిబ్రవరి రేసులో లేదని బెల్లంకొండ శ్రీనివాస్ స్పష్టం చేశాడు. ఇంకా షూటింగ్ 25 శాతం మిగిలి ఉందని.. రెండు షెడ్యూళ్ల షూటింగ్ చేయాల్సి ఉందని.. ఫారిన్లో పాటల చిత్రీకరణ.. భారీ స్థాయిలో క్లైమాక్స్ షూటింగ్ చేయాల్సి ఉందని అతను వెల్లడించాడు. తమ చిత్రాన్ని వేసవి బరిలో నిలపబోతున్నామని.. మే నెలలో ‘సాక్ష్యం’ రిలీజవుతుందని శ్రీనివాస్ తెలిపాడు.

‘రంగస్థలం’తో మొదలుపెడితే.. ‘నా పేరు సూర్య నా ఇల్లు ఇండియా’.. ‘భరత్ అను నేను’.. ‘2.0’.. ఇలా బడా సినిమాలు చాలానే వేసవి బరిలో ఉన్నాయి. సమ్మర్లో ఇంకో మూడు నాలుగు పెద్ద సినిమాలు రిలీజయ్యే అవకాశముంది. వీటికి తోడుగా బెల్లంకొండ శ్రీనివాస్ సినిమా కూడా రాబోతోంది. ఈ చిత్రాన్ని అభిషేక్ నామా నిర్మిస్తుండగా.. పూజా హెగ్డే కథానాయికగా నటిస్తోంది. బెల్లంకొండ శ్రీనివాస్ గత సినిమాల్లాగే ఇదీ భారీ బడ్జెట్లో తెరకెక్కుతోంది. పీటర్ హెయిన్స్ లాంటి నేషనల్ అవార్డ్ విన్నింగ్ ఫైట్ మాస్టర్ ఈ చిత్రానికి పని చేస్తున్నాడు.