నాని వదిన.. చైతూ సినిమాలో

‘ఖుషి’.. ‘సింహాద్రి’ లాంటి బ్లాక్ బస్టర్లలో నటించడమే కాక మెగాస్టార్ చిరంజీవి.. నాగార్జున.. వెంకటేష్.. పవన్ కళ్యాణ్.. మహేష్ బాబు.. జూనియర్ ఎన్టీఆర్ లాంటి ఎంతోమంది సూపర్ స్టార్లతో కలిసి  సినిమాలు చేసిన నటి భూమిక. కొన్నేళ్ల పాటు తెలుగు సినిమాల్లో హవా సాగించిన భూమిక.. ‘అనసూయ’ లాంటి లేడీ ఓరియెంటెడ్ సినిమాతోనూ మెప్పించింది. ఐతే ఉన్నట్లుండి పెళ్లి చేసుకోవడంతో ఆమెకు అవకాశాలు తగ్గిపోయాయి. ఇండస్ట్రీ నుంచి కనుమరుగైంది. ఇప్పుడామె కొంత విరామం తర్వాత ‘ఎంసీఏ’ సినిమాతో టాలీవుడ్లోకి రీఎంట్రీ ఇచ్చింది.

‘ఎంసీఏ’ భూమికకు మరిన్ని అవకాశాలు కూడా తెచ్చిపెట్టేలా ఉంది. ఆమె ఇప్పటికే అక్కినేని నాగచైతన్య హీరోగా తెరకెక్కుతున్న ‘సవ్యసాచి’లో ఓ కీలక పాత్ర దక్కించుకున్నట్లు సమాచారం. చందూ మొండేటి దర్శకత్వంలో తెరకెక్కుతున్న ఈ చిత్రంలో మాధవన్ ఓ కీలక పాత్ర పోషిస్తున్న సంగతి తెలిసిందే. భూమిక అతడికి జోడీగా కనిపించే అవకాశమున్నట్లు సమాచారం. తన పాత్ర గురించి వివరాలు చెప్పలేదు కానీ.. ఈ చిత్రంలో తాను మంచి పాత్ర చేస్తున్న మాట మాత్రం వాస్తవమని ఓ ఇంగ్లిష్ డైలీతో మాట్లాడుతూ భూమిక చెప్పింది. చైతూ.. నిధి అగర్వాల్.. మాధవన్.. భూమిక.. ఇలా చందూ మంచి కాంబినేషనే సెట్ చేశాడు. మైత్రీ మూవీ మేకర్స్ నిర్మాణంలో తెరకెక్కుతున్న ఈ చిత్రం ఓ వైవిధ్యమైన కథతో తెరకెక్కుతోంది. కీరవాణి ఈ చిత్రానికి సంగీతం అందిస్తున్నాడు.