బోయపాటి.. చిన్న సినిమా కాదండోయ్

‘సరైనోడు’ లాంటి బ్లాక్ బస్టర్ తర్వాత బోయపాటి శ్రీను.. బెల్లంకొండ శ్రీనివాస్ లాంటి చిన్న హీరోతో సినిమాకు రెడీ అవడం ఆశ్చర్యకరమైన విషయమే. ఇప్పటిదాకా బోయపాటి స్టార్ హీరోలతోనే పని చేస్తూ వచ్చాడు. అందులోనూ లెజెండ్.. సరైనోడు లాంటి బిగ్ హిట్స్ తర్వాత అతను బెల్లంకొండ శ్రీను డైరెక్టర్ చేయడం ఊహకందని విషయం. ఐతే శ్రీనివాస్ చిన్న హీరోనే కావచ్చు కానీ.. ఈ సినిమా మాత్రం చిన్నది కాదు. బోయపాటి తనదైన శైలిలో ఈ సినిమాను పెద్దదిగా చేయడానికి తన వంతు ప్రయత్నాలన్నీ చేస్తున్నాడు.

బోయపాటి-బెల్లంకొండ సినిమాలో ప్రస్తుతం టాలీవుడ్లో నెంబర్ హీరోయిన్ అనదగ్గ రకుల్ ప్రీత్ సింగ్ కథానాయికగా నటిస్తోంది. ఆమె చాలదని ప్రగ్యా జైశ్వాల్ గ్లామర్ ను కూడా ఈ సినిమాకు అద్దుతున్నాడు బోయపాటి. మరోవైపు ప్రస్తుతం సౌత్ ఇండియాలో మోస్ట్ వాంటెడ్ విలన్ కమ్ క్యారెక్టర్ ఆర్టిస్టు అయిన జగపతిబాబు కోసం కూడా ఓ పాత్ర రెడీ చేశాడు బోయపాటి. ‘లెజెండ్’ సినిమాతో తన కెరీర్ ను మలుపు తిప్పిన బోయపాటి కోసం ఈ పాత్రను సంతోషంగా ఒప్పుకున్నాడట జగపతి. ‘లెజెండ్’ తరహాలోనే ఈ పాత్ర స్టైలిష్ గా ఉంటుందని సమాచారం. ఇక బెల్లంకొండ శ్రీనివాస్ తొలి సినిమా ‘అల్లుడు శీను’ తరహాలోనే ఈ సినిమా చాలా రిచ్ గా తెరకెక్కతోందని సమాచారం. బోయపాటి స్టయిల్లో భారీ యాక్షన్ దృశ్యాలకు ఢోకా ఏమీ ఉండదట. మొత్తంగా ఓ స్టార్ తో సినిమా చేస్తే ఎలా ఉంటుందో అలాగే ఈ చిత్రాన్ని తీర్చిదిద్దడానికి ప్రయత్నాలు చేస్తున్నాడు బోయపాటి. ఈ సినిమాకు ట్రేడ్ లో కూడా మంచి హైపే ఉంది.

Like Us on Facebook : https://www.facebook.com/Tupakidotcom/