రకుల్ కోసం బెల్లం'కొండ' కరిగించేస్తున్నారా

టాలీవుడ్ లో బెల్లంకొండ సాయి శ్రీనివాస్ లాంఛింగ్ గ్రాండ్ గానే జరిగింది. అల్లుడు శీను మూవీతో అనూహ్యమైన వసూళ్లు సాధించాడు. డెబ్యూ హీరో ఆ రేంజ్ వసూళ్లు సాధించడం అంటే అదంతా వివి వినాయక్ చూపించిన మాస్ మహిమే. ఆ తర్వాత రీమేకుల స్పెషలిస్ట్ అయిన భీమినేని శ్రీనివాసరావుతో.. స్పీడున్నోడు అని ట్రై చేశాడు కానీ.. ఉన్న స్పీడ్ కి కూడా బ్రేక్ పడింది.

ఇప్పుడు మరోసారి మాస్ రూట్ నే ఎంచుకున్న బెల్లంకొండ.. మాస్ మూవీస్ ని తీయడంలో ఆరితేరిన బోయపాటి శ్రీనుతో సినిమా చేస్తున్నాడు. ఈ మూవీని ఇప్పిటికే చాలా గ్రాండ్ గా మార్చేశాడు బోయపాటి. చిన్న హీరోతో చేస్తున్నా సరే.. స్టార్ హీరోల మూవీస్ కి ఏ మాత్రం తగ్గకుండా ఈ చిత్రం తెరకెక్కుతోంది. ఇప్పుడీ సినిమాలో ఒక పాట కోసం భారీ మొత్తాన్ని వెచ్చిస్తున్నారట. అన్నపూర్ణ స్టూడియోస్ లో వేస్తున్న ఈ భారీ సెట్ కోసం ఏకంగా 3 కోట్ల రూపాయలు ఖర్చు పెడుతున్నట్లు తెలుస్తోంది.

ఈ బడ్జెట్ తో రెండు లో బడ్జెట్ మూవీస్ కూడా తీసేసి రిలీజ్ చేసేసి సక్సెస్ సాధించచ్చనే సంగతి ఆల్రెడీ 2016 ప్రూవ్ చేసేసింది. అయినా సరే.. బెల్లంకొండతో మూవీ విషయంలో బోయపాటి ఏ మాత్రం కాంప్రమైజ్ కావడం లేదని తెలుస్తోంది. మూడు సార్లు ఈ ప్రాజెక్టుకు నిర్మాతలు మారినా.. తన స్టైల్ లోనే సినిమా తీస్తానంటున్న బోయపాటి.. ఇప్పుడు బెల్లంకొండ-రకుల్ ప్రీత్ లపై తీయనున్న పాట కోసం 3 కోట్లు కరిగించేయడం ఇండస్ట్రీలో హాట్ టాపిక్ అయిపోయింది.

Like Us on Facebook : https://www.facebook.com/Tupakidotcom/