ఈ మధ్య బ్రహ్మి అభిమానులు కొంచెం స్లో అయిపోయారు కానీ.. ఓ రెండేళ్ల ముందు వరకైతే ఇంటర్నెట్లో వారి హంగామా మామూలుగా ఉండేది కాదు. టాలీవుడ్లోని ప్రతి హీరో ఫేసునూ మార్ఫింగ్ చేసి.. బ్రహ్మి తలను అతికించేసి.. ఆయా సినిమాల టైటిళ్లు మార్చేసి.. సోషల్ మీడియాలో భలే వినోదం పండించేవారు బ్రహ్మి ఫ్యాన్స్. బ్రహ్మికి హీరోలతో సమానంగా ఫాలోయింగ్ రావడానికి ఈ సోషల్ మీడియా క్రేజ్ కూడా ఓ కారణం. కానీ ఈ మధ్య బ్రహ్మి జోరు తగ్గిపోయింది. అభిమానుల హంగామా కూడా కనిపించడం లేదు. ఇలాంటి టైంలో బ్రహ్మి ‘సర్దార్ గబ్బర్ సింగ్’ వేషం వేయడం అందరిలోనూ ఆసక్తి రేపుతోంది. ఈ వేషం ఏ సినిమా కోసం వేశాడన్నది తెలియడం లేదు కానీ.. గుర్రం పట్టుకుని ‘సర్దార్’ స్టయిల్లో నడిచొస్తున్న దృశ్యం చూడగానే నవ్వు తెప్పిస్తోంది. స్పూఫ్ లు చేయడంలో కింగ్ అయిన బ్రహ్మి పవన్ ను ఇమిటేట్ చేస్తే ఇక నవ్వులకు కొదవేముంటుంది. మరి ఈ ‘సర్దార్’ వేషమైనా బ్రహ్మిని మళ్లీ ఫామ్ లోకి తెస్తుందేమో చూద్దాం.