సునీల్‌ లేకపోవడం వల్లే నాకు ఛాన్స్‌ లు!

టాలీవుడ్‌ టాప్‌ కమెడియన్‌ ఎవరు అంటే మారు మాట్లాడకుండా ఎక్కువ శాతం చెప్పే పేరు బ్రహ్మానందం. ఈ విషయంలో ఎలాంటి అతిశయోక్తి లేదు. బ్రహ్మానందం గత కొంత కాలంగా కమెడియన్‌ గా అంతగా సక్సెస్‌ కావడం లేదు, మూస తరహాలో ఆయనతో దర్శకులు కామెడీ చేయిస్తున్న కారణంగా ప్రేక్షకులను బ్రహ్మీ నవ్వించలేక పోతున్నాడు. కాని ఆయన గతంలో చేసిన కామెడీ పాత్రలు మరియు సినిమాలు మరో రెండు దశాబ్దాల వరకూ  కూడా బ్రహ్మానందంను టాప్‌ కమెడియన్‌ గా నిలుపుతాయి. అంతటి ఘనత దక్కించుకున్న బ్రహ్మానందం తాజాగా ‘సిల్లీ ఫెలోస్‌’ ప్రీరిలీజ్‌ వేడుకలో చేసిన వ్యాఖ్యలు అందరి దృష్టిని ఆకర్షిస్తున్నాయి.

నరేష్‌ హీరోగా భీమినేని శ్రీనివాస్‌ దర్శకత్వంలో సునీల్‌ ప్రధాన పాత్రలో తెరకెక్కిన ‘సిల్లీ ఫెలోస్‌’ చిత్రం రేపు ప్రేక్షకుల ముందుకు రాబోతున్న విషయం తెల్సిందే. ఈ సందర్బంగా నిర్వహించిన ప్రీ రిలీజ్‌ వేడుకలో బ్రహ్మానందం మాట్లాడుతూ సునీల్‌ పై ప్రశంసలు కురిపించాడు. ఈ సమయంలోనే బ్రహ్మీ మాట్లాడుతూ సునీల్‌ కమెడియన్‌ గా కాస్త గ్యాప్‌ తీసుకుని హీరోగా చేయడం వల్ల నాలాంటి కమెడియన్స్‌ ఇండస్ట్రీలో ఉన్నాం - సునీల్‌ కనుక అప్పటి నుండి కమెడియన్‌ గా కొనసాగితే మాత్రం మేమంతా కూడా ఎప్పుడో పెట్టాబేడా సర్దుకుని వెళ్లేవాళ్ళమని బ్రహ్మానందం అన్నారు.

త్రివిక్రమ్‌ - ఈవీవీలు కలిసి సినిమా చేస్తే ఏ రేంజ్‌ ఎంటర్‌ టైన్‌ మెంట్‌ ఉంటుందో నరేష్‌ - సునీల్‌ లు కలిసి నటించిన ఈ చిత్రంలో అంతే స్థాయి ఎంటర్‌ టైన్‌ మెంట్‌ ఉంటుందని బ్రహ్మానందం సిల్లీ ఫెలోస్‌ పై నమ్మకంను వ్యక్తం చేశాడు. సునీల్‌ తనకు ఇచ్చిన పాత్రకు పూర్తి న్యాయం చేసేందుకు గొడ్డులా పని చేస్తాడని బ్రహ్మానందం అన్నారు. సునీల్‌ మళ్లీ కమెడియన్‌ గా రాణించాలని కోరుకుంటున్నట్లుగా బ్రహ్మానందం పేర్కొన్నారు.