హిట్లు ఫ్లాపులతో సంబంధం లేకుండా కమల్ హాసన్ ను అభిమానించే వాళ్లు కోట్ల మంది ఉన్నారు. భాషా భేదం లేకుండా దేశవ్యాప్తంగా ప్రేక్షకులు ఆయన నటనని, సినిమాల్ని ఇష్టపడతారు. ఐతే కమల్ ఇంతకుముందులా తన అభిమానుల్ని ఎంటర్టైన్ చేయట్లేదన్నది వాస్తవం. కొన్ని సినిమాల ఫలితాలు తేడా కొట్టడం ఓ ఇబ్బందైతే.. ఆయన నుంచి రెగ్యులర్ గా సినిమాలు రాకపోవడం మరో ఇబ్బంది. ‘విశ్వరూపం’ తర్వాత కమల్ సినిమా కోసం రెండేళ్లకు పైగా ఎదురు చూడాల్సి వచ్చింది. ఐతే ‘ఉత్తమ విలన్’ కూడా పెద్దగా ఆకట్టుకోలేదు.
ఐతే నిరాశలో ఉన్న అభిమానుల్లో ఉత్సాహం నింపడానికి ఓ మాంచి థ్రిల్లర్ తో వస్తున్నాడు కమల్. విశ్వ నటుడి కొత్త సినిమా ‘చీకటి రాజ్యం’ ట్రైలర్ చూస్తే ఆయన అభిమానుల్లో ఉత్సాహం ఉప్పొంగడం ఖాయం. ఒక్క రాత్రిలో జరిగే కథతో తెరకెక్కిన ఈ ఈ సినిమా ఆద్యంతం ఉత్కంఠగా సాగబోతోందని ట్రైలర్ చూస్తే అర్థమవుతోంది. స్టాండర్డ్స్ హాలీవుడ్ స్థాయికి ఏమాత్రం తక్కువగా లేవు. అసాంఘిక శక్తుల చెరలో ఉన్న తన కొడుకును కాపాడ్డానికి ఓ అధికారి చేసే పోరాటం నేపథ్యంలో ఈ కథ సాగుతుందని తెలుస్తోంది. ట్రైలర్లోనే మ్యూజిక్ డైరెక్టర్ జిబ్రాన్ తన మ్యాజిక్ చూపించేశాడు. త్రిష కూడా చాలా డిఫరెంటుగా కనిపిస్తోందీ సినిమాలో.
కమల్ దగ్గర చాలా ఏళ్లుగా శిష్యరికం చేస్తున్న రాజేష్ సెల్వ ఈ సినిమాతో దర్శకుడిగా పరిచయమవుతుండటం విశేషం. ఇతను విశ్వరూపం, ఉత్తమ విలన్ సినిమాల్లో చిన్న చిన్న పాత్రలు కూడా పోషించాడు. దీనికి కథ, స్క్రీన్ ప్లే కమలే అందిస్తుండటం విశేషం. ఇంతకముందులాగా కమల్ తమిళ సినిమాను తెలుగులోకి అనువదించకుండా.. ఒకేసారి తమిళంతో పాటు తెలుగులోనూ ఈ సినిమాను తెరకెక్కించడం విశేషం. ఇది తెలుగు సినిమానే అనే ఫీలింగ్ తెప్పించాలనుకున్నాడు కమల్. నవంబరు మొదటి వారంలో తమిళ, తెలుగు భాషల్లో ఒకేసారి ప్రేక్షకుల ముందుకు రానుందీ సినిమా.