సర్దార్ ఆడియో చీఫ్ గెస్ట్ ఎవరంటే..

సరిగ్గా మూడు రోజుల తర్వాత ఈ సమయానికి పవర్ స్టార్ అభిమానుల హంగామా మామూలుగా ఉండదు. హైదరాబాద్ శివార్లలోని నోవాటెల్ హోటల్లో జరిగే ‘సర్దార్ గబ్బర్ సింగ్’ ఆడియో వేడుకలో పవన్ ఫ్యాన్స్ సందడి ఎలా ఉంటుందో అంచనా వేయడం కష్టం. లేక లేక మూడేళ్ల తర్వాత పవన్ తాను హీరోగా నటించిన సినిమా ఆడియో ఫంక్షన్ లో కనిపించబోతున్నాడు. పైగా ఇది అభిమానులకే అంకితమిచ్చిన సినిమా ఆయె. కాబట్టి రచ్చ మామూలుగా ఉండదు. ‘సర్దార్..’ మేకింగ్ వీడియో.. ఆడియో టీజర్.. చూశాక అభిమానుల ఆనందానికి అవధుల్లేకుండా పోయింది. ఇక ఆడియో వేడుకతో సంబరాల్ని మరో స్థాయికి తీసుకెళ్లడానికి సిద్ధమవుతున్నారు అభిమానులు.

ఇంతకీ ‘సర్దార్ గబ్బర్ సింగ్’ ఆడియో వేడుకకు చీఫ్ గెస్ట్ ఎవరన్నదే ఇప్పుడు అందరిలో ఆసక్తి రేపుతున్న ప్రశ్న. విశ్వసనీయ సమాచారం ప్రకారం పవన్ అన్నయ్య - మెగాస్టార్ చిరంజీవే ఈ వేడుకకు ముఖ్య అతిథిగా విచ్చేస్తారట. కొన్నేళ్లుగా అన్నయ్యకు దూరంగా ఉంటున్న పవన్.. ‘సర్దార్..’ మొదలైన నాటి నుంచి రీయూనియన్ కు ప్రయత్నిస్తూనే ఉన్నాడు. పవన్ వెళ్లి చిరును కలిశాడు. చిరు వచ్చి పవన్ నూ కలిశాడు. పైగా ‘సర్దార్..’ సినిమాలో వీణ స్టెప్పు.. చిరు రీమేక్ సాంగ్.. పెట్టడం ద్వారా అన్నయ్యతో తాను తిరిగి కలిసిపోయానని చాటాడు పవన్. ఈ నేపథ్యంలో ఆడియో వేడుకకు చిరు వచ్చాడంటే ఇక అన్నదమ్ముల పునరేకీకరణ సమాప్తమైనట్లే. మరి ఈ సమాచారం నిజం కావాలని ఆశిద్దాం.