చిరు మాట: ఇదిరా చిరంజీవి అంటే..

తన రీఎంట్రీ మూవీ ‘ఖైదీ నెంబర్ 150’ విషయంలో స్వయంగా మెగాస్టార్ చిరంజీవే తన గురించి తనే ఒక రేంజిలో పొగిడేసుకున్నాడు. ఈ సినిమా చూసిన వాళ్లంతా.. ఇదిరా చిరంజీవి అంటే అనుకుంటారని చిరంజీవి వ్యాఖ్యానించడం విశేషం. మూవీ ఆర్టిస్ట్ అసోసియేషన్ (మా) 2017 డెయిరీ లాంచ్ సందర్భంగా చిరు మాట్లాడుతూ ఈ వ్యాఖ్యలు చేశాడు. తన మీద ‘మా’తో పాటు సినీ పరిశ్రమ చూపిస్తున్న అభిమానానికి చిరు కృతజ్నతలు చెప్పాడు.

‘‘నా ఇండస్ట్రీ నుంచి.. నా కళామతల్లి నుంచి నా సోదరులందరూ నేను సినిమాల్లోకి తిరిగి రావాలని ఎంతగానో కోరుకున్నందుకు ధన్యవాదాలు. నా 150వ సినిమాతో నేను పునరాగమనం చేస్తున్నందుకు నాకు 150 గులాబీలతో స్వాగతం పలకడం చాలా ఆనందంగా ఉంది. కచ్చితంగా మీరందరూ గర్వించే విధంగా నా 150వ సినిమా ఉంటుందని కచ్చితంగా చెబుతున్నాను. సినిమా చూశాక అందరూ ఇదిరా చిరంజీవి అని అంటారనే నమ్మకం నాకుంది. ఇప్పుడు కూడా ఏమాత్రం ఒళ్లు ఏమాత్రం దాచుకోకుండా అదే కష్టంతో పని చేశాను. పెర్ఫామెన్స్ ఇచ్చాను. అందులో అన్ని అంశాలు ఉంటాయి. అన్నీ సమపాళ్లలో కుదిరాయి. కచ్చితంగా సినిమా అందరినీ అలరించే విధంగా.. అందరినీ సంతోషపెట్టే విధంగా ఉంటుందని నమ్ముతున్నాను’’ అని చిరంజీవి అన్నాడు. మా అధ్యక్షుడిగా రాజేంద్ర ప్రసాద్ అద్భుతంగా పని చేస్తున్నాడని.. అన్ని బాధ్యతలూ చక్కగా నిర్వర్తిస్తున్నాడని చిరు కితాబిచ్చాడు.

Like Us on Facebook : https://www.facebook.com/Tupakidotcom/