సూపర్ స్టార్ ఫ్యాన్స్ కోసం సర్ ప్రైజ్ వీడియో రిలీజ్ చేసిన దేవిశ్రీ...!

సూపర్ స్టార్ మహేష్ బాబు కెరీర్లో మైలురాయి సిల్వర్ జూబ్లీ మూవీగా రూపొందిన సినిమా 'మహర్షి'. వంశీ పైడిపల్లి దర్శకత్వం వహించిన ఈ సినిమాలో పూజా హెగ్డే హీరోయిన్ గా నటించగా అల్లరి నరేష్ ఒక ప్రముఖ పాత్ర పోషించారు. మహేష్ కెరీర్లో 25వ చిత్రం కావడంతో బడా నిర్మాతలు దిల్ రాజు, అశ్వనీదత్‌, పీవీపీ కలిసి ఈ మూవీని నిర్మించారు. ఈ చిత్రానికి రాక్ స్టార్ దేవిశ్రీ ప్రసాద్ సంగీతం అందించారు. 'ది జర్నీ ఆఫ్ రిషి' అంటూ మహేష్ మూడు విభిన్న షేడ్స్ లో కనిపించగా.. మంచి సందేశాత్మక చిత్రంగా తెరకెక్కిన ఈ సినిమా బ్లాక్ బస్టర్ హిట్ గా నిలిచింది. ముఖ్యంగా డీఎస్పీ అందించిన ఈ చిత్రంలోని పాటలు కొన్ని నెలల పాటు శ్రోతలను ఉర్రుతలూగించాయి. ఈ సినిమా విజయంలో సాంగ్స్ ముఖ్య భూమికను పోషించాయని చెప్పవచ్చు.

'మహర్షి' సినిమా విడుదలై ఏడాది అయిన సందర్భంగా మ్యూజిక్ డైరెక్టర్ దేవిశ్రీ ప్రసాద్ ఒక సర్ప్రైజ్ వీడియోను సూపర్ స్టార్ ఫ్యాన్స్ కి అందించాడు. ఈ సినిమాలోని 'పాలపిట్ట' సాంగ్ కంపొజిషన్ సందర్భంగా చోటు చేసుకున్న ఇన్సిడెంట్ ని సోషల్ మీడియా ద్వారా షేర్ చేసాడు. 'పాలపిట్ట' సాంగ్ ట్యూన్ ఫస్ట్ టైమ్ విన్న మహేష్ ఎక్సయిట్ అయిపోతూ దేవీకి కంగ్రాట్స్ చెప్తున్నట్లు ఈ వీడియోలో కనిపిస్తోంది. మహేష్ బాబుతో పాటు గౌతమ్ సితార మరియు వంశీ పైడిపల్లి కూతురు, రచయిత శ్రీమణి కూడా ఎంజాయ్ చేస్తూ కనిపించారు. ''మహర్షి జర్నీ మర్చిపోలేని అనుభూతిని ఇచ్చింది. ఈ సినిమా వన్ ఇయర్ పూర్తయిన సందర్భంగా మీతో ఒక మెమరీ షేర్ చేసుకుంటున్నాను. పాలపిట్ట సాంగ్ విన్న మహేష్ సర్ ఇన్ స్టంట్ రియాక్షన్ సూపర్'' అంటూ  ట్వీట్ చేసాడు. ఇప్పుడు ఈ వీడియో సోషల్ మీడియాలో వైరల్ అయింది.