దిల్ రాజు మళ్లీ 'స్టార్'ల ప్రొడ్యూసర్

టాలీవుడ్‌లో బడా నిర్మాతల్లో ఒకరైన దిల్ రాజును స్టార్ ప్రొడ్యూసర్ అని పిలుచుకుంటారు. అటు చిన్న సినిమాలతో పాటు ఇటు భారీ చిత్రాలను నిర్మించడంలో కూడా ఈయనకు బోలెడంత అనుభవం ఉంది. కొంతకాలం క్రితం వరకూ ఈ ట్రెండ్ బాగానే ఉన్నా.. ఈ మధ్య చిన్న సినిమాలతో సరిపెట్టుకోవాల్సి వస్తోంది. స్టార్ హీరోల డేట్స్ దొరకడమే దిల్ రాజుకు గగనం అయిపోయింది.

ఇక బడా ప్రొడ్యూసర్ గా దిల్ రాజు శకం చివరికి వచ్చేసిందంటూ కామెంట్స్ బాగానే వినిపించాయి. ఈ ట్రెండ్ కు బ్రేక్ వేస్తూ ఒక్కసారిగా గేర్ మార్చాడు దిల్ రాజు. ఒకేసారి ముగ్గురు స్టార్ హీరోల డేట్స్ ను పట్టేసి.. సినిమాలు తీసేయబోతున్నాడు. 2017 సంవత్సరం దిల్ రాజు కెరీర్ లోనే స్పెషల్ గా నిలిచిపోవడం ఖాయంగా కనిపిస్తోంది. ఇందుకు కారణం.. టాలీవుడ్ పెద్ద హీరోల్లో ముగ్గురితో సినిమా చేయనుండడమే. ఇప్పటిక డీజే-దువ్వాడ జగన్నాధం అంటూ అల్లు అర్జున్-హరీష్ శంకర్ కాంబినేషన్ లో సినిమా చేస్తున్న దిల్ రాజు.. తర్వాత మహేష్ బాబుతో ఓ సినిమా చేయనున్నాడు. వంశీ పైడిపల్లి దర్శకత్వంలో.. అశ్వనీదత్ తో కలిసి ఈ మూవీ నిర్మాణం జరగనుంది.

ఇక రామ్ చరణ్ కూడా దిల్ రాజు బ్యానర్ లో పని చేసేందుకు అంగీకరించాడట. త్వరలో ఈ ప్రాజెక్టుకు సంబంధించిన అనౌన్స్ మెంట్ కూడా వెలువడనుందని తెలుస్తోంది. వచ్చే ఏడాదే ఈ ప్రాజెక్టు కూడా ఉంటుందని టాలీవుడ్ టాక్.

Like Us on Facebook : https://www.facebook.com/Tupakidotcom/