'కిస్సిక్' గ‌ర్ల్‌కి కాశీనాథుని ఆశీస్సులు?

'కుర్చీ మ‌డ‌త‌పెట్టి..' అంటూ కుర్ర‌కారు గుండె గిల్లింది శ్రీలీల‌. త‌న‌వైన ఎన‌ర్జిటిక్ డ్యాన్సులు, గ్లామ‌ర‌సంతో హీటెక్కించిన ఈ బ్యూటీ డిసెంబ‌ర్ 5న విడుద‌ల‌కు వ‌స్తున్న 'పుష్ప 2' లో కిస్సిక్ అంటూ ఐట‌మ్ నంబ‌ర్ తో అగ్గి రాజేయ‌బోతోంది. గుంటూరు కారంలో మ‌హేష్ తో క‌లిసి స్టెప్పులేసిన ఈ బ్యూటీ ఇప్పుడు ఎన‌ర్జిటిక్ అండ్ స్టైలిష్ డ్యాన్సింగ్ స్టార్ అల్లు అర్జున్ తో క‌లిసి స్టెప్పులేయ‌బోతోంది. దీంతో కిస్సిక్ ఈ ఏడాది మోస్ట్ అవైటెడ్ ఐటమ్ నంబ‌ర్ల‌లో ఒక‌టిగా రికార్డులు క్రియేట్ చేయ‌బోతోంది.

ఈ పాట నుంచి తెలుగు అభిమానులు చాలా ఆశిస్తున్నారు. ముఖ్యంగా శ్రీ‌లీల అదిరిపోయే డ్యాన్స్ మూవ్స్.. గ్లామ‌ర్, షో స్టాపింగ్ స్టింట్స్ ఎలివేష‌న్‌తో పాటు, అల్లు అర్జున్ సిగ్నేచర్ స్టైల్ స్టెప్పులు మ‌రోసారి సంచ‌ల‌నంగా మారుతాయ‌ని భావిస్తున్నారు. ఎన‌ర్జిటిక్ శ్రీ‌లీల చేరికతో బ‌న్ని ఫ్యాన్స్ లో కొత్త ఉత్సాహం నిండింది. వారంతా కిస్సిక్ కోసం ఎంతో ఆత్రంగా వేచి చూస్తున్నారు.

పుష్ప 2: ది రూల్ నుండి `కిస్సిక్` పాట‌ను మ‌రో 24 గంట‌ల్లో విడుద‌ల చేయ‌నున్నారు అన‌గానే శ్రీ‌లీల చేసిన ప‌ని ఇప్పుడు చ‌ర్చ‌గా మారింది. ఈ కీల‌క‌ స‌మ‌యంలో శ్రీ‌లీల త‌న త‌ల్లితో క‌లిసి కాశీ-వార‌ణాసి యాత్ర‌లో క‌నిపించింది. అక్క‌డ ప‌విత్ర గంగాన‌దిలో స్నానాదులు ఆచ‌రించి పూజ‌లు పున‌స్కారాలు నిర్వ‌హించింది. భ‌క్తి శ్ర‌ద్ధ‌ల‌తో అక్క‌డ గంగ‌లో త‌మ‌ పూర్వీకుల కోసం ఆచారాలు కొన‌సాగించింది. గంగా ఘాట్ ల‌లో భ‌క్తిలో త‌రిస్తున్న శ్రీ‌లీల ఫోటోగ్రాఫ్స్ ఇప్పుడు అంత‌ర్జాలంలో వైర‌ల్ గా మారుతున్నాయి. అయితే కిస్సిక్ గ‌ర్ల్ కాశీ విశ్వేశ్వ‌రుని ఆశీస్సులు కావాలా? అంటూ అభిమానులు ఆస‌క్తిగా ప్ర‌శ్నిస్తున్నారు. ఈ ఆదివారం కిస్సిక్ సాంగ్ విడుద‌ల కానుంది.