హిట్టు హీరోల్ని వ‌లేసి ప‌డ‌తారు

మెగా ప్రిన్స్ వ‌రుణ్ తేజ్ ప్ర‌స్తుతం వ‌రుస విజ‌యాల‌తో జోరు మీదున్నాడు. ఎఫ్ 2.. గ‌ద్ద‌ల కొండ గ‌ణేష్ చిత్రాల‌తో వ‌రుణ్ పెర్ఫెక్ట్ బ్లాక్ బ‌స్ట‌ర్ల‌తో క‌మ‌ర్షియ‌ల్ హీరోగా త‌న‌ని తాను ఆవిష్క‌రించుకున్నాడు. ఓ వైపు ప్ర‌యోగాల‌తో అల‌రిస్తూనే మ‌రోవైపు క‌మ‌ర్షియ‌ల్ బ్లాక్ బ‌స్ట‌ర్లు కొట్ట‌డం అత‌డికే సాధ్య‌మ‌వుతోంది. ఈ రెండు సినిమాల‌ త‌ర్వాత ఓ క్రీడా నేప‌థ్యం ఉన్న సినిమా కోసం స‌న్నాహాలు చేస్తున్న సంగ‌తి తెలిసిదే. కిర‌ణ్ కొర్ర‌పాటి ద‌ర్శ‌క‌త్వం వ‌హించే ఈ చిత్రంలో బాక్స‌ర్ గా క‌నిపించ‌బోతున్నాడు. అయితే ఈలోగానే మరో వేడెక్కించే వార్త సినీ మీడియాలో ప్ర‌చారం అవుతోంది.

హిట్టు చిత్రాల క‌థానాయ‌కుడిగా వేడెక్కిస్తున్న వ‌రుణ్ తేజ్ ని అగ్ర‌నిర్మాత దిల్ రాజు ఓ సినిమాకి లాక్ చేశారన్న‌దే ఆ వార్త సారాంశం. తొలి ప్రేమ ఫేం వెంకీ అట్లూరి ఈ చిత్రానికి ద‌ర్శ‌క‌త్వం వ‌హించ‌నున్నారు. వ‌రుణ్ కి ఆల్రెడీ హిట్టిచ్చిన వెంకీ ప్ర‌స్తుతం నితిన్ హీరోగా `రంగ్ దే` అనే చిత్రం చేస్తున్నాడు. త‌దుప‌రి వ‌రుణ్ - దిల్ రాజు సినిమా కోసం అత‌డు అన్ని విధాలా రెడీ అవుతున్నాడు. వ‌రుణ్ తో అదిరిపోయే రొమాంటిక్ ఎంట‌ర్ టైన‌ర్ ని తెర‌కెక్కించేందుకు నితిన్ స‌న్నాహాలు చేస్తున్నారు. 2020 ద్వితీయార్థంలో ఈ సినిమా ప‌ట్టాలెక్కే ఛాన్సుంద‌ని తెలుస్తోంది.

స‌క్సెస్ హీరోలతో సినిమాలు చేసేందుకు భారీ ఒప్పందాలు చేసుకోవ‌డం అన్న‌ది ప‌రిశ్ర‌మ‌లో కామ‌న్. అంద‌రు అగ్ర నిర్మాత‌లు ఈ పంథాను అనుస‌రిస్తున్నారు. నాని... విజ‌య్ దేవ‌ర‌కొండ‌.. వ‌రుణ్ తేజ్.. నిఖిల్  స‌హా ప‌లువురు హీరోల‌కు ఈ త‌ర‌హాలోనే ఇటీవ‌ల‌ వ‌రుస‌గా ఆఫ‌ర్లు వెల్లువెత్తుతున్నాయి. శ‌ర్వానంద్.. సాయిధ‌ర‌మ్ లాంటి హీరోల‌కు హిట్లు లేక‌పోయినా ఆఫ‌ర్లు ఇస్తుండ‌డం ఆస‌క్తిక‌ర‌మే. ఫ్లాపు హీరోలు.. ఫ్లాపు డైరెక్ట‌ర్ల‌లో కొంద‌రికి జ‌యాప‌జ‌యాల‌తో సంబంధం లేకుండా గ‌ట్స్ తో అవ‌కాశాలివ్వ‌డం అన్న‌ది ఇటీవ‌ల ఓ కొత్త ట్రెండ్.