ఆ రోగం కాపీ కాదు మొర్రో!!

మారుతి దర్శకత్వంలో రూపొందిన మహానుభావుడు చిత్రం ఇవాళే రిలీజ్ అవుతోంది. ఈ చిత్రంపై కూడా ఇండస్ట్రీతో పాటు ఆడియన్స్ లోనూ.. భలే భలే మగాడివోయ్ రేంజ్ కామెడీని పంచుతాడని ఆశిస్తున్నారు. ట్రైలర్.. ప్రోమోస్ కూడా అందుకు తగినట్లుగానే ఉన్నాయి. మధ్యలో మారుతి బాబు బంగారం అంటూ ఓ ఫ్లాప్ ఇచ్చినా.. అబ్సెసివ్ కంపల్సివ్ డిజార్డర్ థీమ్ తో రూపొందిన మహానుభావుడులో.. ఫన్ ఎలిమెంట్స్ చాలానే ఉన్నాయనే విషయం ఇప్పటికే జనాలకు అర్ధమైంది.

అయితే.. ఈ చిత్ర కథ కాపీ అని.. ఇన్ స్పిరేషన్ అని రూమర్స్ కొన్ని ఉన్నాయి. మలయాళంలో వచ్చిన నార్త్ 24 కాథమ్ మూవీకి ఇది ఫ్రీమేక్ అనేస్తున్నారు కూడా. తాజాగా మహానుభావుడు ప్రమోషన్స్ లో పాల్గొంటున్న మారుతి.. కాపీ ఆరోపణలను నిర్ద్వంద్వంగా ఖండించాడు. ఇది ఏ సినిమాకు రీమేక్ కానీ.. ఫ్రీమేక్ కానీ కాదని.. పూర్తిగా తను రాసుకున్న కథ.. సీన్స్ ఆధారంగానే నడుస్తుందని తేల్చి చెప్పేశాడు. ఇది కంప్లీట్ గా ఒరిజినల్ అని తాను ఇప్పుడు వాదించే కంటే.. సినిమా చూసిన తర్వాత అదే అర్ధమవుతుందని నమ్మకంగా చెబుతున్నాడు మారుతి.

ఓసీడీ కాన్సెప్ట్ తో రూపొందిన పలు చిత్రాలు తాను చూశానని చెప్పిన మారుతి.. ఒక్క సన్నివేశాన్ని కానీ.. స్టోరీ లైన్ ను కానీ ఎక్కడి నుంచి కూడా తీసుకోలేదని తేల్చేశాడు. ఇలాంటి ఆరోపణలు ఎన్ని వచ్చినా.. కంప్లీట్ ఫ్యామిలీ ఎంటర్టెయినర్ గా మెప్పించగలిగితే మాత్రం.. మరోసారి మారుతి నుంచి భలేభలే మగాడివోయ్ మ్యాజిక్ ని ఎక్స్ పెక్ట్ చేసేయచ్చు.