త‌మిళ తంబీల‌తో జ‌క్క‌న్న క్రికెట్‌!

బాహుబలి త‌ర్వాత ద‌ర్శ‌క ధీరుడు రాజ‌మౌళికి ప్ర‌పంచ‌వ్యాప్తంగా గుర్తింపు వ‌చ్చింది. బాహుబ‌లి 1 - 2 చిత్రాల కోసం రాజ‌మౌళి దాదాపుగా 5 సంవ‌త్స‌రాల పాటు అహ‌ర్నిశ‌లు శ్ర‌మించాడు. ఆ సినిమా పూర్తయిన త‌ర్వాత జ‌క్క‌న్న రిలాక్స్ మోడ్ లోకి వెళ్లిపోయాడు. కొంత‌కాలం నుంచి  వివిధ ప్రాంతాల్లో ప‌ర్య‌టిస్తూ - ఫంక్ష‌న్ల‌కు హాజ‌ర‌వుతూ ఎంజాయ్ చేస్తున్నాడు. కొద్ది రోజుల క్రితం రాజ‌ధాని డిజైన్ల గురించి చ‌ర్చించేందుకు రాజ‌మౌళి అమ‌రావ‌తి వెళ్లిన సంగ‌తి తెలిసిందే. తాజాగా - జ‌క్క‌న్న శ్రీ‌లంక‌లో ప్ర‌త్య‌క్ష‌మ‌య్యాడు. యాక్ష‌న్ - క‌ట్ అంటూ ఎపుడూ మెగాఫోన్ ప‌ట్టుకొని ఉండే రాజ‌మౌళి ....ఫోర్‌ - సిక్స‌ర్ అంటూ స‌ర‌దాగా బ్యాట్ ప‌ట్టుకున్నాడు. శ్రీ‌లంక‌లోని లోకల్ త‌మిళ్ క్రికెట్ టీమ్ తో జ‌క్క‌న్న‌ స‌ర‌దాగా క్రికెట్ ఆడాడు. అక్క‌డ త‌మిళ కుర్రాళ్ల‌తో 'ఆట‌'విడుపుగా ఉన్న సంద‌ర్భంలో తీసిన ఫొటోల‌ను ట్విట్ట‌ర్ లో షేర్ చేశాడు. ప్ర‌స్తుతం ఆ ఫొటోల‌ను చూసిన జ‌క్క‌న్న అభిమానులు తెగ మురిసిపోతున్నారు.

బాహుబ‌లి త‌ర్వాత రాజమౌళి ఎవ‌రితో సినిమా తీయ‌బోతున్నాడు? ఎటువంటి క‌థ‌ను ఎంచుకోబోతున్నాడు? అన్న సందేహాలు ఆయ‌న అభిమానుల‌ను వేధిస్తున్నాయి. జ‌క్క‌న్న త‌ర్వాతి సినిమాపై అభిమానుల్లో ఎంతో ఆస‌క్తి ఏర్ప‌డింది. అయితే, రాజ‌మౌళి మాత్రం బాహుబ‌లి త‌ర్వాత దొరికిన విరామాన్ని చ‌క్క‌గా ఎంజాయ్ చేస్తున్నాడు. శ్రీలంక‌లోని గాలేలో రాజ‌మౌళి ప‌ర్య‌టిస్తున్నాడు. ఈ సంద‌ర్భంగా లోకల్ త‌మిళ్ క్రికెట్ టీమ్ తో రాజ‌మౌళి స‌ర‌దాగా క్రికెట్ ఆడాడు. గాలేలో ఆ త‌మిళ‌ కుర్రాళ్ల‌తో గ‌ల్లీ క్రికెట్ ఆడాడు. వారితో క్రికెట్ ఆడ‌డం చాలా ఆనందంగా ఉంద‌ని ట్వీట్ చేశాడు. ఆ క్రికెట్ టీమ్‌తో దిగిన ఫొటోను ట్విట్ట‌ర్లో పోస్ట్ చేశాడు. ''లోక‌ల్ త‌మిళ్ క్రికెట్ టీమ్ ఇన్ గాలే, శ్రీ‌లంక‌...హ్యాడ్ ఫ‌న్ ప్లేయింగ్ విత్ దెమ్‌''అని రాజ‌మౌళి ట్వీట్ చేశాడు.