సునీల్ సినిమా రవితేజ చేస్తున్నాడా?

ఏడాదికి 3-4 సినిమాలు రిలీజ్ చేసే ఎనర్జీ ఉన్న హీరో రవితేజ. అయినా సరే ఎనిమిది నెలలుగా ఒక్క సినిమా కూడా స్టార్ట్ చేయకుండా మాస్ మహరాజ్ సైలెంట్ అయిపోయాడు. దిల్ రాజు బ్యానర్ లోను.. డీవీవీ దానయ్యతోను.. దామోదర ప్రసాద్ నిర్మాణంలోను సినిమాలు అన్నారు కానీ.. వీటిలో ఏదీ ఫైనల్ కాలేదు. అయితే చివరకు రవితేజ మాత్రం చక్కగా ఓ నెల్లాళ్ళ పాటు ఫారిన్‌ ట్రిప్పుకు వెళుతున్నాడు అనే విషయం తెలిసిందే.

కాకపోతే ఇప్పుడు విక్రమ్ అనే కొత్త దర్శకుడితో సినిమా చేసేందుకు ఓకె చెప్పేసి.. వాళ్ళని ప్రీ-ప్రొడక్షన్‌ పనులు చూసుకోమని చెప్పి మనోడు ఫారిన్‌ వెళ్ళాడనే టాక్‌ వినిపిస్తోంది. స్టైలిష్ స్టార్ మూవీ రేసుగుర్రంకి స్క్రీన్ ప్లే రైటర్లలో ఒకడు ఈ విక్రమ్. మరో రైటర్ దీపక్ రాజ్ తో కలిసి.. తాజాగా రవితేజకు ఓ స్టోరీ చెప్పాడట విక్రమ్. గతంలో మిరపకాయ్ మూవీ నుంచి వీరికి అనుబంధం ఉంది. విక్రమ్ చెప్పిన స్టోరీలైన్ నచ్చడంతోపాటు.. బౌండ్ స్క్రిప్ట్ తో రావడంతో.. వెంటనే సినిమా స్టార్ట్ చేద్దామని రవితేజ చెప్పినట్లుగా తెలుస్తోంది. ఈ చిత్రానికి నల్లమలుపు శ్రీనివాస్ నిర్మాతగా వ్యవహరిస్తాడని సమాచారం.

అయితే.. నల్లమలుపు శ్రీనివాస్ నిర్మాణంలో విక్రమ్ ఓ సినిమా చేయనున్నట్లు గతంలోనే వార్తలొచ్చాయి. సునీల్ హీరోగా సినిమా ఉంటుందని అన్నారు. ఆ ప్రాజక్టు పట్టాలెక్కలేదు కానీ.. రవితేజతో సినిమాకి మాత్రం ముహూర్తం చూసుకుంటున్నారని తెలుస్తోంది. మరి సునీల్ కి చెప్పిన స్టోరీ.. రవితేజకు చెప్పిన స్టోరీ ఒకటేనా కాదా తెలియాల్సి ఉంది.