శాతకర్ణి టీఆర్పీ అంతేనా..?

గత సంక్రాంతికి గట్టి పోటీ మధ్య విడుదలై.. బాలయ్య కెరీర్లోనే బిగ్గెస్ హిట్టుగా నిలిచిన సినిమా ‘గౌతమీపుత్ర శాతకర్ణి’. బాలయ్యకు తొలి రూ.50 కోట్ల షేర్ మూవీ ఇదే. అంత పోటీ మధ్య ఆ చిత్రం ఆ స్థాయి వసూళ్లు సాధిస్తుందని ఎవరూ అనుకోలేదు. క్రిష్-బాలయ్య కలిసి చేసిన సాహసానికి ప్రేక్షకులు మంచి ఫలితాన్నే ఇచ్చారు. ఈ చిత్రం ఇటీవలే టీవీలోకి కూడా వచ్చేసింది. ఈ చిత్రాన్ని ఉగాది కానుకగా మార్చి 29న మాటీవీలో ప్రిమియర్ షోగా వేశారు. ఈ సినిమాకు టీఆర్పీ రేటింగ్ కూడా బాగానే వస్తుందిలే అని ఆశించారు కానీ.. అలాంటిదేమీ జరగలేదు. కేవలం 5.5 టీఆర్పీ రేటింగ్ తో పెద్ద షాకే ఇచ్చింది ‘గౌతమీపుత్ర శాతకర్ణి’.

సూపర్ హిట్టయిన సినిమాకు టీవీలో ఇలాంటి రేటింగ్ వస్తుందని ఎవ్వరూ అనుకోలేదు. ఈ చిత్రాన్ని సాయంత్రం 6 గంటల నుంచి మాటీవీలో ప్రసారం చేసి.. రాత్రి 9 గంటలకు మా మూవీస్ లో మరో షో వేశారు. ఇలా రెండు ప్రిమియర్ షోలు వేయడం వల్ల ప్రేక్షకులు చీలిపోయి.. రేటింగ్స్ తగ్గాయేమో తెలియదు. వీకెండ్లో కాకుండా బుధవారం సినిమాను టెలికాస్ట్ చేయడం కూడా ప్రభావం చూపి ఉండొచ్చేమో. ఐతే సంక్రాంతికే విడుదలై బ్లాక్ బ్టస్టర్ హిట్టయిన ఫ్యామిలీ మూవీ ‘శతమానం భవతి’ మాత్రం అదిరిపోయే టీఆర్పీ రేటింగ్ తెచ్చుకోవడం విశేషం. గత ఆదివారం ప్రిమియర్ షోగా పడ్డ ఆ చిత్రానికి 15.44 రేటింగ్ వచ్చింది. ఆ సినిమా స్థాయికి ఇది చాలా మంచి రేటింగే. మరి ‘శాతకర్ణి’కి మరీ అంత తక్కువ రేటింగ్ ఎందుకొచ్చిందన్నదే అర్థం కావడం లేదు. సంక్రాంతికి వచ్చిన మరో సినిమా ‘ఖైదీ నెంబర్ 150’ త్వరలోనే టీవీలో టెలికాస్ట్ అవబోతోంది. మరి దానికి రేటింగ్ ఎలా ఉంటుందో చూడాలి.


Like Us on Facebook : https://www.facebook.com/Tupakidotcom/