నీడలోనే గోపీచంద్ స్టైలిష్ లుక్

మాస్ హీరో గోపీచంద్ స్పీడ్ పెంచేశాడు. 2016 మొత్తం మీద ఒక్క సినిమా కూడా రిలీజ్ చేయలేకపోయిన గోపీచంద్.. ఈ ఏడాది మాత్రం వరుసగా సినిమాలు విడుదల చేసేందుకు రెడీ అవుతున్నాడు. ఇప్పటికే ఆక్సిజన్ మూవీకి గుమ్మడికాయ కొట్టేశారనే న్యూస్ ఉంది. ఇప్పుడు సంపత్ నంది డైరెక్షన్ లో గోపీచంద్ హీరోగా తెరకెక్కనున్న మూవీ సిద్ధమైపోతోంది.

ఫిబ్రవరి 4వ తేదీన ఉదయం 11 గంటలకు ఫస్ట్ లుక్ అంటూ.. ఓ ప్రీలుక్ పోస్టర్ రిలీజ్ చేసింది మూవీ యూనిట్. వెనకాల ఓ లగ్జరీ స్పోర్ట్స్ కార్.. ముందు స్టైల్ గా నడుచుకుంటూ వస్తున్న హీరో గోపీచంద్ సిల్హౌట్.. ప్రీ లుక్ పోస్టర్ అదిరిపోయేలా డిజైన్ చేశారు. బెంగాల్ టైగర్ తర్వాత సంపత్ నంది నుంచి వస్తున్న మూవీ కావడంతో అంచనాలు బాగానే ఉన్నాయి. ప్రీలుక్ తోనే మంచి బజ్ క్రియేట్ చేయడంతో.. ఫస్ట్ లుక్ తో మరింతగా అట్రాక్ట్ చేసే అవకాశాలున్నాయి.

అయితే.. ఇంకా టైటిల్ అనౌన్స్ చేయకపోవడంతో.. ఫస్ట్ లుక్ తో పాటు ఈ సినిమా పేరు ప్రకటిస్తారనే అంచనాలు వినిపిస్తున్నాయి. ఈ చిత్రంలో హన్సిక.. కేథరిన్ థ్రెసాలు హీరోయిన్ లుగా నటించగా.. ఎస్ఎస్ థమన్ సంగీతం అందిస్తున్నాడు. జె. పుల్లారావు.. జే. భగవాన్ లు తమ స్థాయిలోనే మేకింగ్ వాల్యూస్ ఎక్కువగా ఉండేలా.. దర్శకుడికి సంపత్ నందికి ఫ్రీ హ్యాండ్ ఇచ్చారనే టాక్ ఉంది.