నాని సినిమాకి రీమేక్ రేటు అంతా!!

టాలీవుడ్ నిర్మాతల్లో చాలామంది పక్క భాషల వైపు చూస్తూ ఉంటారు. ఏ సినిమా హిట్ అవుతుందా.. రీమేక్ రైట్స్ ఎంతకి బేరం ఆడాలా అన్నట్లుగా ఉంటుంది వ్యవహారం. అయితే టాలీవుడ్ నుంచి కూడా కొన్ని స్టోరీల కోసం ఇతర భాషల నుంచి విపరీతమైన పోటీ ఉంటోంది. ముఖ్యంగా చిన్న సినిమాలకు కూడా భారీ మొత్తం ఇచ్చి కొనుగోలు చేసేందుకు ఇతర భాషల ప్రొడ్యూసర్స్ సిద్ధ పడుతుండడాన్ని గమనించాలి.

రీసెంట్ గా రిలీజ్ అయిన నేచురల్ స్టార్ నాని మూవీ జెంటిల్మన్ కి రీమేక్ రైట్స్ కోసం విపరీతమైన పోటీ నెలకొంది. సస్పెన్స్ డ్రామాగా రూపొందిన ఈ చిత్రం.. చివరి పది నిమిషాల సేపు ఊహించని మలుపులతో ప్రేక్షకులను కట్టిపడేస్తుంది. థ్రిల్లర్ సినిమాలకు క్లైమాక్స్ లో ఇంత పకడ్బందీ స్క్రీన్ ప్లే ఈ మధ్య కాలంలో చూడలేదనే కామెంట్స్ కూడా వినిపిస్తున్నాయి. అందుకే తమిళ, కన్నడ ఇండస్ట్రీల నుంచి జెంటిల్మన్ రీమేక్ రైట్స్ కోసం ఆఫర్లు పెరుగుతున్నాయి.

నిర్మాతలు రేటు ఎక్కువగా చెబుతున్నా.. ఈ జోనర్ కి ఉన్న డిమాండ్ ని దృష్టిలో పెట్టుకుని ఎంతమొత్తమైనా రెడీ అంటున్నారట. దీంతో డీల్ విషయంలో తొందర పడకుండా జాగ్రత్త పడుతున్నారు. ఈ చిత్రానికి గాను థియేట్రికల్ రైట్స్ - శాటిలైట్ రైట్స్ కలిపి.. నిర్మాతలు సేఫ్ జోన్ లోకి వచ్చేశారు. ఈ రీమేక్ రైట్స్ రూపంలో రానున్న మొత్తం ఇప్పుడు వీరికి అదనపు లాభం కానుంది.