మెగా హీరో మూవీకి టైటిల్ అదేనా..?

మెగా ప్రిన్స్ వరుణ్‌ తేజ్‌ బాక్సింగ్ నేపథ్యంలో ఓ సినిమా చేస్తున్న సంగతి తెలిసిందే. డెబ్యూ డైరెక్టర్ కొర్రపాటి కిరణ్‌ కుమార్ ఈ చిత్రాన్ని తెరకెక్కిస్తున్నాడు. అల్లు అరవింద్‌ సమర్పణలో రెనసాన్స్‌ ఫిలింస్‌ - బ్లూ వాటర్‌ క్రియేటివ్‌ బ్యానర్స్‌ పై అల్లు వెంకటేవ్‌(బాబీ) - సిద్ధు ముద్ద ఈ చిత్రాన్ని నిర్మిస్తున్నారు. వరుణ్‌ తేజ్‌ పుట్టినరోజు సందర్భంగా రేపు ఉదయం 10 గంటల 10 నిమిషాలకు 'VT10' ఫస్ట్‌ లుక్‌ విడుదల చేస్తున్నట్లు మేకర్స్ ప్రకటించారు. అయితే ఫిలిం సర్కిల్స్ లో ఈ సినిమా టైటిల్స్ విషయంలో ఆసక్తికరమైన చర్చ జరుగుతోంది.

వరుణ్‌ తేజ్‌ బాక్సర్‌ గా కనిపించనున్న ఈ చిత్రానికి 'బాక్సర్' లేదా 'గని' అనే టైటిల్ ని ఖరారు చేసినట్లు తెలుస్తోంది. ఇకపోతే ఫైటింగ్ నేపథ్యంలో విజయ్ దేవరకొండ హీరోగా 'లైగర్' అనే సినిమా తెరకెక్కుతోంది. 'వీటీ10' ఫస్ట్ లుక్ ని జనవరి 19న రిలీజ్ చేస్తున్నట్లు ప్రకటించిన నేపథ్యంలో ఒక రోజు ముందు 'లైగర్' టైటిల్ అనౌన్స్ చేయడం గమనార్హం. ఏదేమైనా ఇలా బాక్సింగ్ లేదా ఫైటింగ్ బ్యాక్ డ్రాప్ లో రెండు సినిమాలు ఒకేసారి వస్తుండటం ప్రాధాన్యత సంతరించుకుంది. మెగా ప్రిన్స్ సినిమాకి 'బాక్సర్' టైటిల్ ని పెడుతున్నారో లేదా 'గని' అని ఖరారు చేస్తున్నారో తెలియాలంటే రేపటి వరకు ఆగాల్సిందే.