నారా-జగపతి.. ఆట ముగిసింది

‘ఆటగాళ్ళు’ అనే సినిమా నిన్నో మొన్నో సినిమా లాంచ్ అయినట్లుగా ఉంది. అప్పుడే గుమ్మడికాయ కొట్టేసింది చిత్ర బృందం. 2012లో ‘అధినాయకుడు’ తీశాక ఐదేళ్లకు పైగా కనిపించకుండా పోయిన పరుచూరి మురళి తెరకెక్కించిన సినిమా ఇది. అక్టోబర్లో చడీచప్పుడు లేకుండా ఈ సినిమాను అనౌన్స్ చేశాడతను. నారా రోహిత్.. జగపతిబాబుల వెరైటీ కాంబినేషన్లో ఈ సినిమా మొదలవడంతో జనాల్లో ఆసక్తి నెలకొంది. ప్రారంభోత్సవం తర్వాత వార్తల్లో లేని ఈ చిత్రం.. ఇప్పుడు షూటింగ్ ముగించుకుని మళ్లీ వార్తల్లోకి వచ్చింది. నాలుగు నెలల్లోనే టాకీ పార్ట్ అంతా పూర్తి చేసింది చిత్ర బృందం.

ఇక పోస్ట్ ప్రొడక్షన్ కార్యక్రమాలు మొదలుపెట్టి వేసవిలోనే ‘ఆటగాళ్ళు’ను ప్రేక్షకుల ముందుకు తేవాలని భావిస్తున్నారు. ఈ చిత్రంలో జగపతిబాబు క్రిమినల్ లాయర్ గా కనిపించబోతుండగా.. నారా రోహిత్ సినిమా దర్శకుడిగా కనిపిస్తాడట. వీరి మధ్య ఎత్తులు పైఎత్తులతో సాగే సినిమా ఇది అంటున్నారు. మెజారిటీ షూటింగ్ రామోజీ ఫిలిం సిటీలోనే అవగొట్టారు. తక్కువ రోజుల్లో.. తక్కువ బడ్జెట్లోనే సినిమాను పూర్తి చేశారు. నలుగురు కొత్త నిర్మాతలు కలిసి నిర్మిస్తున్న ఈ చిత్రానికి సాయికార్తీక్ సంగీతం సమకూరుస్తుండగా.. విజయ్.సి.కుమార్ ఛాయాగ్రహణం అందిస్తున్నాడు. నారా రోహిత్ ఇది కాక మూణ్నాలుగు సినిమాలు లైన్లో పెట్టగా.. జగపతిబాబు ప్రస్తుతం అరడజనుకు పైగా సినిమాల్లో నటిస్తుండటం విశేషం.