అలనాటి అందాల తార మ‌ళ్లీ సినిమాల్లో..

జ‌య‌ప్ర‌ద ఒక న‌టి అనే విష‌యం జ‌నాలు మ‌రిచిపోయారు. గ‌త రెండు ద‌శాబ్దాల నుంచి ఆమె రాజ‌కీయ నాయ‌కురాలిగానే చెలామ‌ణి అవుతున్నారు. ఉత్త‌ర ప్ర‌దేశ్ రాజ‌కీయాల్లో కీల‌క పాత్ర పోషిస్తూ వ‌చ్చారామె. ఐతే ఈ మ‌ధ్య ఆమె రాజ‌కీయ భ‌విత‌వ్యంపై నీలి నీడ‌లు క‌మ్మ‌కున్నాయి. ఈ నేప‌థ్యంలో మ‌ళ్లీ సినిమాల వైపు చూస్తున్న‌ట్లుంది అల‌నాటి అందాల తార‌. జ‌య‌ప్ర‌ద‌ ప్ర‌స్తుతం ఓ మ‌ల‌యాళ సినిమాలో న‌టిస్తుండ‌టం విశేషం. ఆ సినిమా పేరు ‘కిన్నారు’. ఆఫ్ బీట్ సినిమాల‌కు పెట్టింది పేరైన ఎం.ఎ.నిషాద్ అనే ద‌ర్శ‌కుడు ఈ చిత్రాన్ని రూపొందిస్తున్నాడు.

‘కిన్నారు’ సామాజిక ప్ర‌యోజ‌నం కోసం చేస్తున్న సినిమా అని.. నీటిని కాపాడుకోవాల్సిన ఆవ‌శ్య‌క‌త గురించి ఇందులో చెబుతున్నామ‌ని.. ఇలాంటి మంచి సినిమాతో మ‌ళ్లీ మ‌ల‌యాళ సినిమాలోకి రీఎంట్రీ ఇస్తుండ‌టం చాలా ఆనందంగా ఉంద‌ని జ‌య‌ప్ర‌ద తెలిపింది. ఆమె చివ‌ర‌గా మ‌ళ‌యాళంలో ‘ప్ర‌ణ‌యం’ అనే సినిమా చేసింది. బ్లెస్సీ ద‌ర్శ‌క‌త్వంలో తెర‌కెక్కిన ఈ సినిమాలో మోహ‌న్ లాల్ తో పాటు బాలీవుడ్ న‌టుడు అనుప‌మ్ ఖేర్ ముఖ్య పాత్ర‌లు పోషించారు. తెలుగులో జ‌య‌ప్ర‌ద చివ‌ర‌గా 2007లో వ‌చ్చిన‌ బాల‌య్య సినిమా ‘మ‌హార‌థి’లో న‌టించింది. అదే ఏడాది క‌మ‌ల్ మూవీ ‘ద‌శావ‌తారం’లోనూ ఆమె త‌ళుక్కుమంది.

Like Us on Facebook : https://www.facebook.com/Tupakidotcom/