ఈ వీడియో చూశాక ఆగడం కష్టమే

బాలీవుడ్ సూపర్ స్టార్లు సైతం తమ సినిమాల ప్రమోషన్ కు ఎంతో ప్రాధాన్యం ఇస్తారు. సినిమాకు హైప్ పెరగాలంటే ఆమాత్రం చేయక తప్పదు. కానీ రజినీకాంత్ సినిమాల ప్రమోషన్లలో మాత్రం ఆయన ఎక్కడా కనిపించరు. ఇంతకుముందు చేసిన సినిమాలకు కనీసం ఆడియో వేడుకలో అయినా కనిపించాడు. కానీ ‘కబాలి’కి అది కూడా లేదు. అయినా ఈ సినిమాకు మామూలు హైప్ రాలేదు.

ఒక్క టీజర్ తోనే జనాల్ని మెస్మరైజ్ చేసేసి.. సినిమాకు కావాల్సినంత హైప్ తీసుకొచ్చేశాడు సూపర్ స్టార్. మధ్య మధ్యలో సినిమాలోని కొన్ని రజినీ స్టిల్స్.. కొన్ని పోస్టర్లు.. పాటలకు సంబంధించిన కొన్ని విజువల్స్.. రిలీజ్ చేస్తూ సినిమాను మరింతగా జనాల్లోకి తీసుకెళ్లింది ‘కబాలి’ టీమ్. ఇక సినిమా విడుదలకు సమయం దగ్గరపడుతున్న టైంలో నిమిషం నిడివి ఉన్న ఓ మేకింగ్ వీడియో రిలీజ్ చేసి.. అభిమానుల్లో మరింత ఉత్సాహాన్ని నింపారు.

ఓ సన్నివేశం చేసేటపుడు రజినీ ఎలా సన్నద్ధమవుతాడో.. దర్శకుడితో ఎలా కోఆర్డినేట్ చేసుకుంటాడో.. ఎలా రిహార్సల్స్ చేస్తాడో.. ఈ వీడియో చూస్తే అర్థమవుతుంది. ఇందులో రజినీ ఎనర్జీ చూస్తే ఆశ్చర్యపోతారు ఎవరైనా. తనదైన శైలిలో నడుస్తూ.. మేనరిజమ్స్ ఇస్తూ.. షూటింగ్ స్పాట్లో ఉన్నవాళ్లందరికీ కిక్కు ఇస్తున్నాడు రజినీ. ఈ వీడియో చూశాక సినిమా కోసం రజినీ అభిమానులు ఆగడం కష్టమే.
Full View