నీటి అడుగులో నందమూరి హీరో

ఎంత కష్టపడుతున్నా విజయలక్ష్మి చాలా అరుదుగా పలకరిస్తున్న హీరో కళ్యాణ్ రామ్. తన కృషిలో లోపం లేకపోయినా మనసుకు నచ్చిన కథలు తెరమీదకు వచ్చేటప్పటికి ఫలితాలు తేడా కొడుతున్నాయి. ఈ ఏడాది ఇప్పటికే రెండు సినిమాలు ఎమ్మెల్యే-నా నువ్వే తో పలకరించిన ఈ నందమూరి హీరో మూడోది కూడా రెడీ చేస్తున్నాడు. ప్రముఖ సినిమాటోగ్రాఫర్ గుహన్ రచనా దర్శకత్వంలో కళ్యాణ్ రామ్ నటిస్తున్న కొత్త సినిమా షూటింగ్ ఎటువంటి హడావిడి లేకుండా సైలెంట్ గా జరిగిపోతోంది. ఆ మధ్య హీరో పుట్టినరోజు సందర్భంగా జస్ట్ ఒక స్టిల్ ని మాత్రమే విడుదల చేసిన టీమ్ ఇంకా టైటిల్ ని ఫిక్స్ చేయాల్సి ఉంది. ఓ పది శాతం తప్ప దాదాపు షూటింగ్ మొత్తం పూర్తి చేసుకున్న ఈ మూవీ కోసం కళ్యాణ్ రామ్ ఓ మినీ సాహసం చేయబోతున్నాడట. అది కూడా నేల  మీదో గాలిలోలో కాదు. ఏకంగా నీటిలోపల. ఇప్పటిదాకా ఇలాంటిది ట్రై చేయని కళ్యాణ్ రామ్ దీని గురించి రెడీ అవుతున్నాడట.

కథలో భాగంగా వచ్చే ఒక కీలకమైన ఎపిసోడ్ కోసం దీన్ని వైజాగ్ సముద్రంలో తీయబోతున్నారు. ఇందుకోసం ఫారిన్ నుంచి డైవింగ్ ఎక్స్ పర్ట్స్ ని కూడా పిలిపించబోతున్నారు. కళ్యాణ్ రామ్ సైతం డూప్ లేకుండా నిపుణుల సహాయంతో స్వంతంగా చేయడానికి డిసైడ్ అయినట్టు తెలిసింది. ఇది యాక్షన్ నేపథ్యంలో వచ్చే  ఫైట్ సీన్ గా ఉంటుందని తెలిసింది. దీంతో పాటు ఇంకొక్క పాట షూట్ చేస్తే గుమ్మడి కాయ కొట్టవచ్చు. రెండు మూడు టైటిల్స్ పరిశీలనలో ఉన్నా యూనిట్ ఫైనల్ గా ఏ నిర్ణయానికి రాలేకపోతోంది. సెప్టెంబర్ 13 వినాయక చవితి పండగ సందర్భంగా దీని ఫస్ట్ లుక్ తో పాటు టైటిల్ ప్రకటించే అవకాశాలు ఉన్నాయి. విడుదల తేదీ మాత్రం ఇంకా నిర్ణయం తీసుకోలేదు. దసరాకు తమ్ముడు తారక్ మూవీ అరవింద సమేత వీర రాఘవ ఉంది కాబట్టి దాని తర్వాతే ప్లాన్ చేస్తున్నట్టు తెలిసింది.