ఎన్టీఆర్, ప్రభాస్ రూట్లో బన్నీ!

స్టార్ హీరోలు ఎవరైనా తమ సినిమాల ప్రీరిలీజ్ ఈవెంట్ కోసం ప్రభుత్వం పర్మిషన్ కావాలన్నా, టికెట్ రేట్లు పెంచుకోవడానికి అనుమతి ఇవ్వాలన్నా కచ్చితంగా యాంటీ డ్రగ్ క్యాంపైన్ వీడియో రిలీజ్ చేయాలని తెలంగాణ ముఖ్యమంత్రి రేవంత్ రెడ్డి కండిషన్ పెట్టారు. ఈ కండిషన్ ని ఫాలో అవుతూ ఇప్పటికే ఎన్టీఆర్, ప్రభాస్, మెగాస్టార్ యాంటీ డ్రగ్ క్యాంపైన్ వీడియోస్ వారి సినిమాల రిలీజ్ కి ముందు చేశారు.

మెగాస్టార్ చిరంజీవి అయితే స్వచ్చందంగా ముందుకొచ్చి మూవీ రిలీజ్ లేకపోయిన యాంటీ డ్రగ్ వీడియో విడుదల చేశారు. టాలీవుడ్ ఇండస్ట్రీలో స్టార్ హీరోలు అందరూ కూడా దీనిని కచ్చితంగా ఫాలో అవ్వాల్సిందే. అలా అయితేనే ప్రభుత్వం నుంచి వారి సినిమాలకి అన్ని రకాల అనుమతులు దొరుకుతాయి. ఐకాన్ స్టార్ అల్లు అర్జున్ ‘పుష్ప 2’ మూవీ డిసెంబర్ 5న థియేటర్స్ లోకి రాబోతోంది. డిసెంబర్ 1న ఈ మూవీ ప్రీరిలీజ్ ఈవెంట్ ని మేకర్స్ హైదరాబాద్ లో నిర్వహించబోతున్నారు. పోలీస్ గ్రౌండ్స్ లో దీనికి ఏర్పాట్లు జరుగుతున్నాయి.

ఈ ప్రీరిలీజ్ ఈవెంట్ లోపే బన్నీతో యాంటీ డ్రగ్స్ క్యాంపైన్ వీడియో ఒకటి చేసి సోషల్ మీడియాలో విడుదల చేయాలని మేకర్స్ భావిస్తున్నారు. బన్నీ కూడా దీనికి సానుకూలంగానే ఉన్నట్లు టాక్ వినిపిస్తోంది. కొద్ది రోజుల్లో ఈ వీడియోని ప్రేక్షకుల ముందుకి తీసుకొని వస్తారంట. ఇప్పటికే మేకర్స్ ప్రీరిలీజ్ ఈవెంట్ అనుమతుల కోసం ప్రభుత్వానికి దరఖాస్తు చేసుకున్నారు.

వీడియో రిలీజ్ చేస్తే అనుమతులు వస్తాయి. ఇదిలా ఉంటే రెండు తెలుగు రాష్ట్రాలలో టికెట్ ధరలు, ఎక్స్ ట్రా బెన్ ఫిట్ షోలకి కూడా అనుమతులు తీసుకునే పనిలో మేకర్స్ ఉన్నారు. రెండు రాష్ట్రాల ప్రభుత్వాలు సానుకూలంగానే వనిర్మాతలకి కావాల్సిన పర్మిషన్స్ ఇచ్చే అవకాశం ఉందని అనుకుంటున్నారు. సోషల్ మీడియాలో జరుగుతోన్న నెగిటివ్ క్యాంపైన్ ప్రభావం చూపించే అవకాశం ఉందని కొందరు భావిస్తున్నారు.

అయితే ఏపీ సర్కార్ లో పవన్ కళ్యాణ్ భాగస్వామిగా ఉన్న నేపథ్యంలో ఈజీగా పర్మిషన్స్ వస్తాయని ఇండస్ట్రీ వర్గాలలో అనుకుంటున్నారు. మూవీ టికెట్ ధరలు పెంచితే తెలుగు రాష్ట్రాలలో ఈ సినిమాకి మొదటి రోజు భారీ కలెక్షన్స్ వచ్చే అవకాశం ఉంటుంది. ఇదిలా ఉంటే భారీ అంచనాల మధ్యలో రిలీజ్ అవుతోన్న ‘పుష్ప 2’ సినిమా మొదటి రోజు 200 కోట్లకి పైగా కలెక్షన్స్ అందుకుంటుందని ట్రేడ్ పండితులు అంచనా వేస్తున్నారు.