‘ఇజం’ మాస్కుల‌తో పిచ్చెక్కిస్తున్నారుగా..

ఒక సినిమాను పూర్తి చేయ‌డం కంటే దాన్ని జ‌నాల్లోకి తీసుకెళ్ల‌డం క‌ష్ట‌మైపోతోంది ఈ రోజుల్లో. వారం గ‌డిస్తే సినిమా థియేట‌ర్ల‌లో నిల‌వ‌డం క‌ష్ట‌మైపోతుండ‌టంతో.. ప్రేక్ష‌కుల్ని సాధ్య‌మైనంత త్వ‌ర‌గా థియేట‌ర్ల‌కు తీసుకురావ‌డం చాలా కీల‌కం అయిపోతోంది. ఓపెనింగ్సే సినిమాకు ప్రాణంగా మారుతుండ‌టంతో వాటి కోసం ప్ర‌చారం కొంచెం గ‌ట్టిగానే చేయాల్సి వ‌స్తోంది. ఇందుకోసం ఉన్న మార్గాల‌న్నింటినీ వాడేసుకుంటున్నారు. నంద‌మూరి క‌ళ్యాణ్ రామ్ త‌న కొత్త సినిమా ‘ఇజం’ విష‌యంలోనూ చాలా అగ్రెసివ్ ప్ర‌మోష‌న్ల‌తో ముందుకెళ్తున్నాడు.

ముందు నుంచి ‘ఇజం’ సినిమాను గ‌ట్టిగా ప్ర‌మోట్ చేస్తున్న క‌ళ్యాణ్ రామ్.. రిలీజ్ డేట్ ద‌గ్గ‌ర ప‌డుతున్న నేప‌థ్యంలో ‘ఇజం’ ట్రైల‌ర్లో చూపించిన త‌ర‌హాలో కుర్రాళ్ల‌కు మాస్కులు వేయించి.. స్పెష‌ల్ గా సినిమా పోస్ట‌ర్ల‌తో సైకిళ్లు డిజైన్ చేయించి హైద‌రాబాద్ రోడ్ల మీదికి పంపించాడు. వాళ్లు న‌గ‌ర‌మంతా విస్తృతంగా తిరిగేస్తూ జ‌నాల్ని ఆక‌ర్సిస్తున్నారు. ముఖ్యంగా కూడ‌ళ్ల ద‌గ్గ‌ర ‘ఇజం’ మాస్కుల‌తో కుర్రాళ్లు చేస్తున్న సంద‌డి జ‌నాల్ని బాగానే ఆక‌ట్టుకుంటోంది. మ‌రోవైపు సోష‌ల్ మీడియాలోనూ ‘ఇజం’ ప్ర‌మోష‌న్లు బాగానే జ‌రుగుతున్నాయి. రోజూ కొత్త పోస్ట‌ర్లు వ‌దులుతూ.. కౌంట్ డౌన్ న‌డుపుతూ ‘ఇజం’ లైమ్ లైట్లో ఉండేలా చూసుకుంటున్నారు. తాజాగా క‌ళ్యాణ్ రామ్ ‘ఇజం’ కోసం ప‌డ్డ క‌ష్టాన్ని చూపిస్తూ ఒక వీడియో కూడా వ‌దిలాడు పూరి జ‌గ‌న్నాథ్‌.

Like Us on Facebook : https://www.facebook.com/Tupakidotcom/