ఇజం రిలీజ్ డేట్ మారింది

ఒకటి రెండు కాదు.. ఏకంగా ఐదు సినిమాలు వచ్చేశాయి దసరాకు. ఇక తర్వాతి వారం కొత్త సినిమాలేవీ రాకపోయినా పర్వాలేదు. చెప్పుకోదగ్గ సినిమాలేవీ కూడా షెడ్యూల్ అయి లేవు. ఇప్పుడు థియేటర్లలో ఉన్న సినిమాలతోనే తర్వాతి వీకెండ్‌ ను కూడా లాగించేయొచ్చు. ఇక ఆ తర్వాతి వారంలో మళ్లీ కొత్త సినిమాల సందడి మొదలవుతుంది. ఆ వారానికి అందరి కళ్లూ ‘ఇజం’ మీదే ఉండబోతున్నాయి.

ముందు ఈ చిత్రాన్ని అక్టోబరు 20న.. గురువారం రిలీజ్ చేద్దామనుకున్నారు. ఐతే తర్వాత శుక్రవారం సెంటిమెంటుకే ఓటేశారు. 21న ‘ఇజం’ ప్రేక్షకుల ముందుకొస్తుందని సమాచారం. ఇంకా రిలీజ్ డేట్ గురించి అఫీషియల్ అనౌన్స్ మెంట్ రాలేదు కానీ.. 21న పక్కా అంటున్నారు. అదే శుక్రవారం నారా రోహిత్ సినిమా ‘శంకర’ కూడా వస్తుందంటున్నారు. కాబట్టి నందమూరి వెర్సస్ నారా పోరు చూడబోతున్నామన్నమాట.

‘పటాస్’ లాంటి పెద్ద సక్సెస్ తర్వాత ‘షేర్’ సినిమాతో దబేల్మని కింద పడ్డాడు కళ్యాణ్ రామ్. ఇప్పుడు అతడికి సక్సెస్ చాలా అవసరం. అలాగే ‘టెంపర్’ తర్వాత ‘జ్యోతిలక్ష్మీ’.. ‘లోఫర్’ సినిమాలతో దెబ్బతిన్నాడు పూరి. ఆయన కూడా తనేంటో రుజువు చేసుకోవాల్సిన స్థితిలో ఉన్నాడు. కళ్యాణ్ రామ్ కెరీర్లోనే అత్యధిక బడ్జెట్ తో తెరకెక్కిన సినిమాల్లో ఇదొకటి. దాదాపు రూ.20 కోట్లు పెట్టేశాడతను. ఐతే సినిమా మీద బజ్ అయితే బాగానే ఉంది. ఓపెనింగ్స్ బాగానే వచ్చే అవకాశాలున్నాయి. మరి టాక్ ఎలా వస్తుందో.. ఫైనల్ రిజల్ట్ ఎలా ఉంటుందో చూడాలి.

Like Us on Facebook : https://www.facebook.com/Tupakidotcom/