ది గ్రేటెస్ట్ రైవల్రీ: ఇండియా (Vs) పాకిస్తాన్ ట్రైలర్

నెట్‌ఫ్లిక్స్ లైన‌ప్‌లో చాలా ఆస‌క్తిక‌ర వెబ్ సిరీస్‌లు, డాక్యుమెంట‌రీలు ఉత్సాహం పెంచుతున్నాయి. వీటిలో 'ది గ్రేటెస్ట్ రైవల్రీ: ఇండియా వర్సెస్ పాకిస్తాన్' అనే డాక్యుమెంటరీ ఒక‌టి. తాజాగా ట్రైల‌ర్ విడుద‌లైంది. ఈ ట్రైల‌ర్ ఆద్యంతం దాయాదుల మ‌ధ్య పోరుకు సంబంధించిన విశ్లేష‌ణ‌లు ర‌క్తి క‌ట్టిస్తున్నాయి.

క్రికెట్ చరిత్రలో అత్యంత తీవ్రమైన పోటీ - ఎమోష‌న్స్ క‌లయిక ఎలా ఉంటుందో 'ది గ్రేటెస్ట్ రైవ‌ల్రీ' డాక్యు సిరీస్ ట్రైల‌ర్‌లో చూపించారు. 2025 ఫిబ్రవరి 7న ఇది విడుద‌ల కానుంది. దిగ్గ‌జ క్రికెట్ టీమ్ లు త‌మ‌ వైరాన్ని సంవత్సరాలుగా ఎలా సాగించాయి? తీవ్రమైన భావోద్వేగాలు, ఉత్కంఠభరితమైన క్షణాలను తెర‌పై చూడండి అంటూ నెట్ ఫ్లిక్స్ ప్ర‌క‌టించింది.

ఈ ట్రైలర్‌లో రెండు దేశాలకు చెందిన దిగ్గజ క్రికెటర్లు క‌నిపించారు. సునీల్ గవాస్కర్, సచిన్ టెండూల్కర్, వీరేంద్ర సెహ్వాగ్ , సౌరవ్ గంగూలీ వంటి లెజెండ‌రీ భారతీయ క్రికెట్ దిగ్గజాలతో పాటు, షోయబ్ అక్తర్, వసీం అక్రమ్ వంటి పాకిస్తాన్ క్రికెట్ దిగ్గజాలు ట్రైల‌ర్ లో క‌నిపించారు. క్రికెట్ హిస్ట‌రీలో అత్యంత చిరస్మరణీయమైన మ్యాచ్‌లతో సంబంధీకులైన ఈ క్రికెటర్లు, క్రికెట్ మైదానంలో తలపడటం వల్ల వచ్చే ఒత్తిడి గురించి మాట్లాడారు.క్రికెట్ దిగ్గజాల ఇంటర్వ్యూలు, వ్యాఖ్యానాలతో పాటు డాక్యుమెంటరీ ర‌క్తి క‌ట్టించ‌నుంది.

భారతదేశం-పాకిస్తాన్ మ్యాచ్ అంటే బ్యాట్ కి బంతికి మధ్య జరిగే మ్యాచ్ కాదు. ఇది దాని కంటే చాలా పెద్దది అని సెహ్వాగ్ చెప్పే డైలాగ్ తో ట్రైల‌ర్ ఉత్సాహం పెంచింది. 22 మంది ఆడుతుండవచ్చు, కానీ బిలియన్ల మంది ఉత్సాహంగా వేచి ఉన్నారు అంటూ గంగూలీ వ్యాఖ్యానించారు. షోయబ్ అక్తర్ మాట్లాడుతూ.. లోపల 1,00,000 మంది వేచి ఉన్నారు.మరో 1,00,000 మంది బయట వేచి ఉన్నారు అని చెబుతున్న విజువ‌ల్ ఇంటెన్స్ గా క‌నిపిస్తుంది.

వీరేంద్ర సెహ్వాగ్, సౌరవ్ గంగూలీ, షోయబ్ అక్తర్, సునీల్ గవాస్కర్, ఇంజమామ్-ఉల్-హక్ స‌హా దిగ్గజ క్రికెటర్లు ఓచోటికి వచ్చి లక్షలాది మందిని ఆకర్షించిన గొప్ప ఆట గురించిన స్టోరి ఇది. ఫిబ్రవరి 7న నెట్‌ఫ్లిక్స్‌లో స్ట్రీమ్ కానుంది.