జ‌క్క‌న్నను క‌ర‌ణ్ ఏ రేంజిలో పొగిడాడంటే..

‘బాహుబ‌లి’ విడుద‌ల‌య్యాక అంద‌రూ రాజ‌మౌళిని పొగిడేశారు. ఆకాశానికెత్తేశారు. ఐతే ఆ సినిమా విడుద‌ల కాక‌ముందే మ‌న జ‌క్క‌న్న‌ను న‌మ్మిన‌వాడు క‌ర‌ణ్ జోహార్. ‘బాహుబ‌లి హిందీలోనూ అంత భారీగా విడుద‌లై సంచ‌ల‌నం సృష్టించిందంటే అందుకు క‌ర‌ణ్ కూడా కార‌ణ‌మే. ఈ సినిమా విడుద‌ల‌కు ముందు నుంచి రాజ‌మౌళి గురించి గొప్ప‌గానే మాట్లాడుతున్నాడు క‌ర‌ణ్‌. రిలీజ్ త‌ర్వాత కూడా ప‌లుమార్లు జ‌క్క‌న్న‌ను పొగిడాడు. స్వ‌యంగా అంత పెద్ద ద‌ర్శ‌కుడై ఉండి రాజ‌మౌళిని ప్ర‌శంసించే విష‌యంలో ఎప్పుడూ వెనుకంజ వేయ‌లేదు క‌ర‌ణ్‌. తాజాగా త‌న సినిమా ‘ఏ దిల్ హై ముష్కిల్ ప్ర‌మోష‌న్ కార్య‌క్ర‌మంలో జ‌క్క‌న్న‌ను.. బాహుబ‌లి సినిమాను తెగ పొగిడేశాడు క‌ర‌ణ్‌.

బాహుబ‌లిః ది బిగినింగ్ అంచ‌నాల్లేకుండా విడుద‌లై అంత పెద్ద విజ‌యం సాధించింద‌ని.. ఇక కంక్లూజ‌న్ ఏ రేంజికి వెళ్తుందో తెలియ‌ద‌ని క‌ర‌ణ్ అన్నాడు. దీనికి హ‌ద్దులేమీ లేవ‌ని.. ఏ రేంజికైనా వెళ్లొచ్చ‌ని.. దానికి అంత శ‌క్తి ఉంద‌ని చెప్పాడు. బాహుబ‌లి సినిమాతో పోటీ ప‌డే సాహ‌సం ఏ హిందీ సినిమా కూడా చేయ‌లేద‌ని.. దాని వ‌ల్ల అన్నిటికీ ముప్పేన‌ని క‌ర‌ణ్ తెలిపాడు. బాహుబ‌లి సినిమాను తాను స‌గ‌టు అభిమాని లాగా చూసి ఆశ్చ‌ర్య‌పోయాన‌ని.. మ‌న సినిమా స్థాయిని ఎక్క‌డికో తీసుకెళ్లిన రాజ‌మౌళిని సంతోషంగా హ‌త్తుకున్నాన‌ని.. ఇండియన్ సినిమాలో బాహుబ‌లి కంటే భారీత‌నం ఉన్న సినిమా ఇంకేదీ లేద‌ని క‌ర‌ణ్ అన్నాడు. ‘బాహుబ‌లిః ది కంక్లూజ‌న్’ కోసం తాను ఉత్కంఠ‌గా ఎదురు చూస్తున్న‌ట్లు క‌ర‌ణ్ తెలిపాడు.

Like Us on Facebook : https://www.facebook.com/Tupakidotcom/