కంగనా బయోపిక్ కోసం ఎదురుచూస్తున్నా

బాలీవుడ్ క్వీన్ కంగనా రనౌత్ ను సాధారణమైన స్టార్ హీరోయిన్ల గాటన కట్టలేం.  కష్టపడి పైకొచ్చి స్టార్ డమ్ సాధించడం ఒక ఎత్తైతే.. మేల్ డామినేషన్ ఎక్కువగా ఉన్న బాలీవుడ్లో స్టార్ హీరోలకు దీటుగా తన సినిమాలకు బిజినెస్ జరగడం.. హీరోల సినిమాలతో పోటీగా బాక్స్ ఆఫీస్ వసూళ్లు సాధించే స్థాయికి ఎదగడం గొప్పవిషయమే. ఇది ఒక వైపైతే.. మరో వైపు తన డోంట్ కేర్ యాటిట్యూడ్ తో వివాదాల్లో చిక్కుకోవడం మరో కోణం.  బాలీవుడ్ తనను అణగదొక్కాలని చూస్తోందని.. తనను ఒంటరి చేస్తున్నారని సూటిగానే అందరిపై విమర్శలు చేస్తోంది.  కానీ కంగనాకు బాలీవుడ్ లో కొందరు సెలబ్రిటీల నుండి మద్దతు లభిస్తోంది.

కొద్దిరోజుల క్రితం సీనియర్ బాలీవుడ్ నటుడు అనుపమ్ ఖేర్ 'మణికర్ణిక' సినిమా గురించి మాట్లాడుతో కంగనా ఒక అద్భుతమైన నటి.. చాలా ఆత్మవిశ్వాసం కలిగిన అమ్మాయి  అంటూ ఆకాశానికెత్తేశాడు.  తాజాగా బాలీవుడ్ స్టార్ హీరోయిన్ కరీనా కపూర్ ఖాన్ తనకు కంగనా అంటే చాలా ఇష్టమని ఓపెన్ గా చెప్పేసింది.  రీసెంట్ గా కంగనా తన బయోపిక్ ను టేకప్ చేస్తానని ప్రకటించింది కదా. ఆ సినిమాకు కేవీ విజయేంద్ర ప్రసాద్ రచయితగా పని చేస్తారని కూడా ఆమె చెప్పింది.  ఈ విషయం పై స్పందిస్తూ కంగనా ఒక ప్రతిభావంతమైన నటి.  ఆమె బయోపిక్ కోసం ఎదురు చూస్తున్నాని చెప్పింది.  

"నాకు కంగనా అంటే చాలా ఇష్టం. ఆమె ఒక తెలివైన మహిళ" అంటూ మరో బాలీవుడ్ స్టార్ హీరోయిన్ కంగనా గురించి చెప్పడం కంగనాకు బాలీవుడ్ లో మెల్లగా పెరుగుతున్న మద్దతును సూచిస్తోంది. ఇదిలా ఉంటే  'మణికర్ణిక' సినిమాను చూశారా? అని కరీనాను అడిగితే.. ఇంకా చూడలేదని.. కానీ సైఫ్ ఆ సినిమాను చూసి మెచ్చుకున్నాడని తెలిపింది.