అతని ఆశలన్నీ గ్యాంగ్ లీడర్ పైనే

ఆరెక్స్ 100తో రెండో సినిమాతోనే యూత్ లో మంచి ఫాలోయింగ్ తెచ్చుకున్న యంగ్ హీరో కార్తికేయ సబ్జెక్ట్ సెలక్షన్ చేసిన తప్పుల వల్ల ఆ తర్వాత వరసగా రెండు దెబ్బలు తినాల్సి వచ్చింది. బ్యానర్ బిల్డప్ చూసి గుడ్డిగా ఒప్పుకున్న హిప్పి కరెంట్ షాక్ ఇవ్వగా కథలోని కీలక పాయింట్ తప్ప మిగిలింది నిర్లక్ష్యం చేయడం మూలాన గుణ 369 హెచ్చరికగా మిగిలిపోయింది. ఇప్పుడు ఇతగాడి ఆశలన్నీ గ్యాంగ్ లీడర్ మీదే ఉన్నాయి.

న్యాచురల్ స్టార్ నాని హీరోగా విక్రం కుమార్ దర్శకత్వంలో రూపొందుతున్న ఈ మూవీలో కార్తికేయ తొలిసారి విలన్ వేషం ఎత్తాడు. కెరీర్ మొదటిదశలోనే ఇలాంటి నిర్ణయం తీసుకోవడం పట్ల అందరూ ఆశ్చర్యం వ్యక్తం చేసినప్పటికీ స్టొరీ బాగా నచ్చడంతో పాటు బ్రేక్ ఇచ్చే సినిమాగా భావించడంతో ఒప్పుకున్నట్టుగా చెబుతున్నారు .ఏది ఎలా ఉన్నా గ్యాంగ్ లీడర్ కార్తికేయకు ఓ సవాల్ లాంటిదే. నాని ఫ్లోని తట్టుకుని మరీ తన ఉనికిని చాటాల్సి ఉంటుంది. అదంత ఈజీ కాదు.

దీని రిజల్ట్ కార్తికేయ పాత్రకు వచ్చే రెస్పాన్స్ ని బట్టే ఇప్పుడు నిర్మాణంలో ఉన్న 90 ఎంఎల్ కు బిజినెస్ పరంగా క్రేజ్ వస్తుంది. అందుకే గ్యాంగ్ లీడర్ విడుదల కోసం ఇతను చాలా ఆసక్తిగా ఎదురు చూస్తున్నాడు. సాహోతో పాటు థియేటర్లలోకి ట్రైలర్ వదిలితే బ్రహ్మాండమైన హైప్ వస్తుందని ఆశించిన మేకర్స్ కు అది ఆశించిన ఫలితాన్ని ఇవ్వడం లేదు. సాహో టాక్ బాగా నెగటివ్ గా ఉండటంతో ఇంటర్వెల్ గ్యాప్ లో వదులుతున్న గ్యాంగ్ లీడర్ ట్రైలర్ ని ప్రేక్షకులు లైట్ తీసుకుంటున్నారు. ఇది పక్కన పెడితే కార్తికేయకు గ్యాంగ్ లీడర్ ఎలాంటి ఫలితాన్ని ఇవ్వబోతోందో వేచి చూడాలి