మణికర్ణిక టీజర్.. క్రిష్ సంగతేంటి?

కంగనా రనౌత్ ప్రధాన పాత్రలో తెరకెక్కుతున్న బాలీవుడ్ మూవీ ‘మణికర్ణిక’ టీజర్ ఈ రోజు ఉదయమే ప్రేక్షకుల ముందుకొచ్చింది. ఈ సినిమా ఔట్ పుట్ మీద నెలకొన్న అనేక సందేహాలకు తెరదించుతూ టాప్ క్లాస్ విజువల్స్‌తో ఆకట్టుకుంది ఈ టీజర్. ఝాన్సీ లక్ష్మీబాయిగా కంగనా రనౌత్ లుక్.. స్క్రీన్ ప్రెజెన్స్.. హావభావాలు అన్నీ అదిరిపోయాయనే ఫీడ్ బ్యాక్ వచ్చింది. ఐతే ఈ చిత్ర దర్శకుడు క్రిష్ విషయంలో చిత్ర బృందం ఎలా స్పందిస్తుంది.. అతడికి టీజర్లో ఎలాంటి గౌరవం ఇస్తుంది.. టీజర్ రిలీజ్ సందర్భంగా క్రిష్ ఎలా వ్యవహరిస్తాడు అనే సందేహాలు అందరిలోనూ ఉన్నాయి.

క్రిష్ తాను అనుకున్నట్లుగా సినిమా తీసి పెట్టి.. దాన్నుంచి బయటికి వచ్చేశాక కంగనా రనౌత్ డైరెక్టర్ కుర్చీలో కూర్చుని రీషూట్లు చేయడం.. పాత సన్నివేశాలు తీసేసి కొత్తవి జత చేయడంతో ఆమెకు కూడా దర్శకత్వ క్రెడిట్ ఇస్తారేమో అన్న సందేహాలు కూడా కలిగాయి. ఐతే టీజర్లో అలాంటిదేమీ లేదు.

దర్శకుడిగా క్రిష్ పేరే వేశారు. కాకపోతే టైటిల్స్ వేసేటపుడు క్రిష్ పేరు ప్రత్యేకంగా కాకుండా.. పైన నిర్మాణ సంస్థల పేర్లు వేసి.. కింద డైరెక్టర్ అంటూ అతడి పేరు వేశారు. ఇక్కడ క్రిష్ కు ప్రాధాన్యం తగ్గించే ప్రయత్నం చేసిన భావన కలిగింది. ఇక ‘మణికర్ణిక’ నుంచి బయటికి వచ్చేశాక దాని ఊసే ఎత్తని క్రిష్.. టీజర్ రిలీజ్ టైంలో సైలెంటుగా ఉండదని భావించి.. ట్విట్టర్లో దాని లింక్ షేర్ చేశాడు. ఐతే జస్ట్ టీజర్ లింక్ షేర్ చేశాడు తప్పితే.. ఈ సినిమాకు సంబంధించిన తన అనుభవాలు పంచుకోవడం కానీ.. ఎగ్జైట్మెంట్ చూపించడం కానీ చేయలేదు క్రిష్. మరి సినిమా విడుదలకు ముందు క్రిష్ ప్రమోషన్లకు వెళ్తాడా లేదా.. రిలీజ్ టైంలో ఎలా వ్యవహరిస్తాడు అన్నది ఆసక్తికరం.